Dështimi diplomatik i Osmanit dhe Kurtit | Biden fliste për njohjen nga Serbia para 1 viti, as nuk e përmend këtë vit

Kryeministri Albin Kurti dhe presidentja Vjosa Osmani në politikën e jashtme kanë dështuar tërësisht. Kjo dëshmohet edhe nga mesazhi i letrave për urimin e pavarësisë që presidenti i ShBA-së, Joe Biden, e bëri vitin e kaluar dhe këtë vit, shkruan Demokracia.com.

Vitin e kaluar, Biden e përmendi njohjen e ndërsjelltë midis Kosovës dhe Serbisë në letrën uruese të 15-vjetorit të pavarësisë.

“Ne mirëpresim miratimin tuaj të propozimit të BE-së për normalizimin, me qëllimin përfundimtar të njohjes reciproke, e cila do të ndihmonte në sigurimin e një të ardhmeje më paqësore dhe më prosperuese për popullin e Kosovës dhe Serbisë”, thuhej në letrën e Biden të vitin e kaluar.

Por, këtë vit, mesazhi është ndryshe. Biden përmend zbatimin e marrëveshjeve me Serbinë dhe jo njohjen e ndërsjelltë.

“Kosova dhe SHBA-ja ndajnë një miqësi të qëndrueshme dhe partneritet – të përforcuar nga vizioni i përbashkët për një rajon më paqësor, të sigurt dhe të suksesshëm. SHBA-ja fuqishëm e mbështet një Kosovë multietnike dhe integrimin e saj në institucionet evropiane dhe euro-atlantike. Ne po ashtu vazhdojmë t’i mbështesim përpjekjet e dialogut të lehtësuara nga BE-ja për të arritur një marrëveshje normalizimi gjithëpërfshirëse me Serbinë – një hap i rëndësishëm përpara njohjes reciproke në fund (të procesit)”, shkruan në letrën e presidentit Biden.

Po ashtu, në letrën e Biden thuhet se “bashkë me vendet e rajonit dhe botës, SHBA-ja e inkurajon lidershipin e Kosovës që t’i përmbushë obligimet e tij, përfshirë të gjitha marrëveshjet e kaluara të arritura përmes këtij procesi”.

Njohja e ndërsjelltë shihej ndër vite si rezultat përfundimtar i dialogut, e cila do të hapte rrugët për dy vendet për integrimin dhe anëtarësimin në instancat evropiane. Qeveria Kurti me veprimet e njëanëshme, duke acaruar aleatët e Kosovës dhe krisur raportet me ShBA-në, ka bërë që rruga drejt integrimeve evropiane të ngadalësohet.