Presidenti ukrainas, Volodymyr Zelensky, ka theksuar rëndësinë e dialogut konstruktiv gjatë rundit të fundit të negociatave mes delegacioneve ukrainase dhe amerikane, që u zhvilluan të dielën në Florida. Lajmi u bë i ditur nga Ukrinform, duke cituar një mesazh të Zelensky-t në llogarinë e tij në Telegram.
“Sot, pas punës së ekipeve në Shtetet e Bashkuara, kreu i delegacionit ukrainas, Rustem Umerov, raportoi mbi parametrat kryesorë të dialogut, pikat e tij kryesore dhe disa rezultate paraprake”, shkroi Zelensky.
Ai theksoi se bisedimet ishin “konstruktive” dhe se të gjitha çështjet u trajtuan hapur, me qëllimin e përbashkët të garantimit të sovranitetit dhe interesave kombëtare të Ukrainës.
Presidenti ukrainas shprehu mirënjohje ndaj Shteteve të Bashkuara, ekipit të presidentit Donald Trump dhe vetë presidentit amerikan për kohën dhe përkushtimin e investuar “intensivisht” në përcaktimin e hapave për t’i dhënë fund luftës. “Ne do të vazhdojmë të punojmë”, shtoi ai, duke theksuar se pret një raport të plotë nga ekipi ukrainas gjatë një takimi personal.
Ndërkohë, Sekretari i Këshillit të Sigurisë dhe Mbrojtjes Kombëtare të Ukrainës, Rustem Umerov, deklaroi se bisedimet në Florida kanë sjellë përparim të ndjeshëm drejt arritjes së një “paqes së drejtë” dhe kanë afruar pozicionet mes Ukrainës dhe SHBA-së.
