Protesta të mëdha kundër administratës së Presidentit Donald Trump janë zhvilluar në disa qytete anembanë SHBA-së.
Sipas mediave të huaja, këto protesta kanë shënuar përsëritjen e tretë të tubimeve “Pa Mbretër” që më parë kanë tërhequr miliona njerëz.
Organizatorët thanë se po protestojnë kundër politikave të imponuara nga Presidenti i SHBA-së, Donald Trump, duke përfshirë luftën në Iran, zbatimin federal të ligjit për imigracionin dhe rritjen e kostos së jetesës.
“Trump dëshiron të na sundojë si një tiran. Por kjo është Amerika dhe pushteti i përket popullit, jo atyre që aspirojnë të bëhen mbretër apo miqve të tyre miliarderë”, thanë organizatorët.
Një zëdhënës i Shtëpisë së Bardhë i quajti protestat “Seanca Terapie për Çrregullimin e Trumpit”.
Gjatë gjithë ditës së shtunë, demonstrata u zhvilluan në pothuajse çdo qytet të madh të SHBA-së, duke përfshirë Nju Jorkun, Uashington DC, Los Anxhelos, Boston, Nashvilli dhe Hjustoni. Turma njerëzish u mblodhën gjithashtu në qytete dhe qyteza më të vogla në të gjithë vendin.
Tubimet pushtuan rrugët e qendrës së Uashingtonit gjatë gjithë pasdites, me turma njerëzish që marshonin nëpër kryeqytetin e vendit. Protestuesit mbushën shkallët e Memorialit të Linkolnit dhe Sheshin Kombëtar.
