Agjencia Shqiptare e Zhvillimit të Investimeve (AIDA) ka nisur gjatë muajit qershor 2026 një fushatë takimesh derë më derë me kompani me kapital gjerman, italian, austriak, hungarez, holandez dhe zviceran që operojnë në Shqipëri, në kuadër të Programit Aftercare 2026.
Qëllimi i kësaj nisme është të intensifikojë komunikimin me investitorët e huaj ekzistues, duke evidentuar sfidat që hasin në aktivitetin e tyre dhe duke diskutuar mundësitë për zgjerim, riinvestime dhe zhvillim të mëtejshëm të bizneseve në vend.
Sipas AIDA-s, programi synon të ofrojë mbështetje më të afërt për investitorët dhe të krijojë kushte më të favorshme për rritjen e investimeve. Takimet do të shërbejnë për të adresuar çështje që lidhen me klimën e biznesit, procedurat administrative, infrastrukturën dhe nevojën për fuqi punëtore të kualifikuar.
Programi Aftercare 2026 realizohet në bashkëpunim me Ministrinë e Ekonomisë dhe Inovacionit, Ministrin e Shtetit për Pushtetin Vendor dhe ambasadat e vendeve pjesëmarrëse, me synimin për të ndërtuar një bashkëpunim të qëndrueshëm mes institucioneve publike dhe sektorit privat.
Në kuadër të këtij angazhimi, AIDA ka nënshkruar 12 memorandume mirëkuptimi me bashki në të gjithë Shqipërinë, për të përmirësuar koordinimin institucional dhe për të ofruar mbështetje më efikase ndaj investitorëve.
Njëkohësisht, agjencia po zhvillon një platformë digjitale të dedikuar shërbimit Aftercare, e cila do t’u mundësojë investitorëve të komunikojnë në kohë reale me institucionet, të raportojnë problematikat dhe të ndjekin zgjidhjen e tyre.
Përmes kësaj fushate, AIDA synon të forcojë marrëdhëniet me investitorët e huaj, të përmirësojë klimën e biznesit dhe të nxisë zgjerimin e investimeve në Shqipëri, ndërsa programi pritet të përfshijë edhe vende të tjera në fazat e ardhshme.
