Zëvendëskryeministri i Maqedonisë së Veriut, Arben Fetai, ka zhvilluar sot një vizitë zyrtare në Prishtinë, ku u prit nga kryeministri i Republikës së Kosovës, Albin Kurti.
I shoqëruar nga përfaqësues të Aleancës për Shqiptarët, Fetai theksoi rëndësinë simbolike dhe kombëtare të lidhjes mes shqiptarëve, duke përmendur autostradën “Arbën Xhaferi” si një urë që përçon më shumë se thjesht infrastrukturë – një lidhje shpirtërore dhe kombëtare.
Gjatë takimit, të dy liderët diskutuan për thellimin e bashkëpunimit mes shqiptarëve në rajon, me theks të veçantë në zhvillimin ekonomik dhe përparimin demokratik. “Na bashkon një vizion dhe një ideal i përbashkët që nuk njeh kufij dhe as pengesa,” u shpreh Fetai pas takimit.
Vizita vjen në një moment kur intensifikimi i bashkëpunimit ndërshqiptar shihet si kyç për stabilitetin dhe progresin rajonal.
