Një ditë pasi kremtoi 25-vjetorin e krijimit, institucioni i Avokatit të Popullit u rikthye të jetë ‘mollë sherri’ në Kuvendin e Shqipërisë. Në seancën e parafundit të kësaj legjislature Partia Demokratike kërkoi që në rend të ditës të futej urgjent votimi i Avokatit të ri të Popullit duke kërkuar që të votohej emri i saj, Besim Ndregjoni.
“Problemi i Avokatit të Popullit është një problem që shtyhet prej një viti. Kreu juaj Ramaduro nuk pranon kandidaturën që paraqet opozita, ndonëse ai plotëson çdo kriter dhe e nderon atë detyra. Ju kërkoni të imponoheni, përmes përjashtimeve pa asnjë kriter, kandidaturat e opozitës. Për ju kandidatura nuk pranohet vetëm se ka persekutim dhe burgosje politike. Z. Ndregjoni i plotëson të gjitha kriteret. Hajde ta votojmë dhe ta mbyllim këtë punë”, tha Berisha.
Për mazhorancën, e drejta që vjen nga tradita e opozitës për të propozuar emrin për Avokat të Popullit do të respektohet por kjo duhet të vijë pas një procesi.
“Ju nuk mund të vini, o ky o ramë e vdiqëm. Peleshi në mënyrë të përsëritur, Çuçi dhe unë u kemi thënë ejani të ndërtojmë një proces. Ju mund të sillni 4 kandidatura, hiqen 2 me propozim të mazhorancës dhe shkohet me dy kandidaturat e mbetur për t’u votuar. Mos harroni asnjëherë që kërkohen 84 vota, në këtë legjislaturë nuk janë. Nuk keni dashur vetë ta zgjidhni”, tha Balla.
“Të rinisim një proces, emri të vijë nga opozita siç është tradita. Tani jemi pas zgjedhjeve ta rimarrim, ta vazhdojmë. Nëse kemi kohë ta bëjmë brenda kësaj legjislature. Por ka mbetur edhe një seancë dhe duket se do ta rimarrim në shtator”, tha Peleshi.
Nga ana tjetër, kreu i grupit të PD, Gazment Bardhi dhe deputeti Dashnor Sula ngritën si problematikë shtyrjen e raportimeve të institucioneve të drejtësisë në Kuvend. Bardhi tha se ky vendim është një shkelje e Kushtetutës. Por kryeparlamentarja Elisa Spiropali tha se shkak është bërë mosprezenca e deputetëve.
“Duhet të vijohet me kalendarin e raportimeve të institucioneve të pavarura. Duhet të vijnë në Kuvend, dhe të ketë mundësinë për të lëshuar rekomandime për përmirësimin e punës së tyre. S’mund të mbyllni kuvendin për llogaridhënien e tyre. Vendimi juaj është shkelje flagrante e kushtetutës dhe të afateve që përcakton rregulloja e kuvendit.”, tha Bardhi.
“Ka qenë në pamundësi të drejtuesve të komisioneve për t’i përfshirë në dëgjesë për shkak të prezencës së deputetëve dhe të tjerave çështje.”, replikoi Spiropali.
Kërkesa për shumicë të cilësuar prej 84 votash për të votuar Avokatin e Popullit e ka mbajtur peng zgjedhjen e titullarit të këtij institucioni kyç kushtetues që prej 3 vitesh. Në shkurt, kur Partia Demokratike kishte sjellë disa emra por që insistonte që ish i përndjekuri politik Besim Ndregjoni të ishte Avokati i ri i Popullit, duke mos gjetur konsensusin për emrin mazhoranca dhe opozita ranë dakord që të shtyjnë për një kohë të pacaktuar votimin. Erinda Ballanca qëndron në detyrë, edhe pse mandati 5-vjeçar i ka mbaruar që prej qershorit të vitit 2022.
Në rend të ditës janë një sërë projektligjesh, mes të cilëve ndryshimet në ligjin e sportit, projektligji për ratifikimin e marrëveshjes së huas ndërmjet Shqipërisë dhe BERZH, si dhe ndryshimet për strukturën dhe klasifikimin e pagave të personelit pranë KQZ.
