Datat 13- 17 Gusht 2025 rikthejnë Festën e Birrës në Korçë. Kjo festë do të jetë një nga ngjarjet më të shumëpritura të verës, duke tërhequr edhe vizitorë të shumtë nga përtej kufijve të vendit.
Teksa jemi në prag të kësaj feste blutë e Korçës kanë ndërmarrë një plan masah për mirëmbajtjen e aktivitetit. Kështu bllokim të qarkullimit të makinave do të ketë nga “City Center” deri tek rrethrrotullimi në afërsi të terminalit, gjatë orarit 19:30-01:00.
Gjithashtu do të kryhet menaxhimi i trafikut gjatë lëvizjes së mjeteve dhe këmbësorëve, në rrugët: “Midhi Kostani”, “Kiço Greço”, “Marigo Pozio”, në pikat e hyrjes në terminalin e autobusëve, si dhe në zonat e tjera përreth ku zhvillohen aktivitetet.
Njoftimi i plotë:
Më datë 13.08.2025 deri më datë 17.08.2025, në ambientet e brendshme të terminalit të autobusëve dhe te Pazari i Vjetër, nga ora 20:00 deri në orën 01:00, do të zhvillohet eventi i Festës së Birrës.
Drejtoria Vendore e Policisë Korçë dhe strukturat në vartësi të saj kanë marrë një sërë masash në drejtim të garantimit të rendit dhe qetësisë publike, për zhvillimin dhe manifestimin sa më të qetë dhe festiv të këtij aktiviteti. Këto masa konsistojnë në përforcimin e parametrave të sigurisë rrugore, disiplinimin e lëvizjes dhe menaxhimin e trafikut, parandalimin e aksidenteve automobilistike, parandalimin e veprimeve të kundërligjshme në drejtim të krimeve kundër personit, pronës, krimeve financiare, në fushën e narkotikëve, si dhe mbajtjen në kontroll të personave me precedent kriminal. Gjithashtu, në kuadër të këtij aktiviteti do të kryen patrullime dhe kontrolle të përbashkëta, në bashkëpunim me Policinë Bashkiake.
Nga shërbimet e Sektorit të Policisë Rrugore do të merren masa për bllokimin e qarkullimit të automjeteve nga “City Center” deri tek rrethrrotullimi në afërsi të terminalit, gjatë orarit 19:30-01:00.
Orientimi i lëvizjes së automjeteve për në vendet e përcaktuara, për parkim, nga bashkia Korçë, kryesisht përreth terminalit të autobusëve, do të bëhet në bashkëpunim me autoritetet bashkiake.
Gjithashtu do të kryhet menaxhimi i trafikut gjatë lëvizjes së mjeteve dhe këmbësorëve, në rrugët: “Midhi Kostani”, “Kiço Greço”, “Marigo Pozio”, në pikat e hyrjes në terminalin e autobusëve, si dhe në zonat e tjera përreth ku zhvillohen aktivitetet.
Në të gjithë qytetin, në vendet që do të zhvillohet festa ku pritet të ketë grumbullim dhe qarkullim më të madh të njerëzve, në bulevardet kryesore dhe në akset rrugore që lidhin Korçën me rrethet e tjera, do të ketë prezencë të shtuar të shërbimeve të Policisë së Rendit, Policisë Kriminale, Policisë Rrugore, grupeve të FNSH-së dhe Forcës së Posaçme “Shqiponja”, të cilët do të mbikëqyrin ruajtjen e rendit, do të ndërhyjnë për zgjidhjen e problematikave dhe do të parandalojnë krijimin e situatave të ndryshme, të cilat mund të cenojnë sigurinë publike.
Policia Rrugore apelon të gjithë drejtuesit e automjeteve të respektojnë rregullat e qarkullimit rrugor, të mos përdorin pije alkoolike gjatë drejtimit të mjetit, të vendosin rripin e sigurimit dhe kaskën mbrojtëse, të mos përdorin celularin, me qëllim shmangien e ngjarjeve të mundshme rrugore, ose të zgjedhin përdorimin e shërbimeve të transportit publik për lëvizjet e tyre.
Shërbimet e Rendit do të kujdesen gjithashtu për të mbajtur kontakt të vazhdueshëm me drejtuesit e objekteve me rëndësi të veçantë, si nënstacionet elektrike dhe ujësjellësit, për të forcuar masat e ruajtjes së tyre.
Të gjithë qytetarët të cilët do të ndeshen me problematika apo shqetësime të ndryshme, ftohen të telefonojnë në numrat pa pagesë 112 dhe 129. Shërbimet e Policisë do të ofrojnë reagim të shpejtë dhe të paanshëm.
Ju falënderojmë për mirëkuptimin dhe urojmë aktivitet të mbarë!
