Nga 11 qershori deri më 19 korrik në SHBA, Meksikë dhe Kanada do të zhvillohet faza finale e Kupës së Botës 2026.
Kupa e Botës 2026 pritet të jetë një spektakël global në SHBA, Meksikë dhe Kanada, por jo për të gjithë yjet e futbollit. Dëmtimet e rënda kanë nisur të lënë jashtë disa prej emrave më të mëdhenj, duke prishur ëndrrën e tyre për të qenë pjesë e turneut më prestigjioz.
Argjentina mund të jetë pa Juan Foyth, i cili ka këputur tendinën e Akilit. Në dyshim mbetet edhe Cristian Romero pas një dëmtimi në gju, ndërsa i riu Joaquin Panichelli humbi përfundimisht turneun pas një tjetër dëmtimi të rëndë në ligament.
Brazili nuk do të ketë në dispozicion Rodrygon, i cili ka pësuar këputje të ligamentit të kryqëzuar. Edhe talenti Estevao Willian do të mungojë për shkak të një dëmtimi muskulor.
Te Kroacia vijon të mbetet në pikëpyetje gjendja e Josko Gvardiol. Franca ka humbur Hugo Ekitike pas një lëndimi, ndërsa edhe Boubacar Kamara mbetet jashtë për shkak të një dëmtimi serioz në gju.
Te Gjermania portieri Marc-Andre ter Stegen vazhdon të vuajë nga problemet fizike, ndërsa Serge Gnabry do të mungojë përfundimisht.
Japonia nuk do të ketë Takumi Minamino dhe Kaoru Mitoma, ndërsa Wataru Endo arriti të rikthehej në kohë. Te Meksika janë të konfirmuara mungesat e Luis Angel Malagon dhe Marcel Ruiz, ndërsa Edson Alvarez mbetet në dyshim.
Holanda rrezikon të jetë pa Matthijs de Ligt dhe Xavi Simons. Spanja ka në dyshim Mikel Merino, teksa jashtë ka mbetur Samu Omorodion për shkak të dëmtimit në ligament.
SHBA mund të humbasë Cameron Carter-Vickers dhe Johnny Cardoso, me shqetësime edhe për Christian Pulisic.
