Të dhënat e publikuara të hënën nga qeveria britanike, sipas AFP, tregojnë se disa drejtues të zyrave postare në Mbretërinë e Bashkuar kanë marrë dëmshpërblime prej më shumë se një miliard paundësh (1,19 miliardë euro) si viktima të akuzave të rreme.
Nga viti 1999 deri në 2015, gati një mijë drejtues të zyrave të Post Office, shërbimi publik postar, u akuzuan për vjedhje dhe u paditën në bazë të informacioneve të pasakta që u gjeneruan nga Horizon, një program kompjuterik i kontabilitetit i prodhuar nga kompania Fujitsu. Ata u detyruan të paguanin shuma që në mënyrë të rreme rezultonin si përfitime të munguara, duke i çuar shumë prej tyre drejt falimentimit – disa madje përfunduan edhe në burg. Programi ka shkaktuar mijëra viktima të tjera, kujton AFP.
Në janar të vitit 2024, një serial televiziv i transmetuar nga ITV, që tregonte betejën ligjore të njërit prej postierëve, Alan Bates, e riktheu në vëmendje këtë skandal. Më pas, disa dënime u anuluan dhe një komision hetimor analizoi dosjen, të cilën ish-kryeministri Rishi Sunak e cilësoi si “një nga gabimet më të mëdha gjyqësore në histori”.
Shifrat
Të dhënat e publikuara të hënën nga ministria e tregtisë tregojnë se “deri më 2 qershor 2025 janë paguar 1,04 miliardë paundë (nga qeveria dhe Post Office) për më shumë se 7300 persona”, si rezultat i më shumë se 11.000 ankesave.
Për shembull, 167 milionë paundë (198 milionë euro) janë shpërndarë për 416 ish-drejtues të zyrave postare, përfshirë edhe Alan Bates, të cilët fituan gjyqet kundër Post Office; 245 milionë paundë kanë përfituar 463 postierë të dënuar padrejtësisht dhe të shpallur të pafajshëm vitin e kaluar në bazë të një ligji special; ndërkohë, 68 milionë paundë janë paguar për 71 të dënuar të rehabilituar nga drejtësia.
Drejtori i Përgjithshëm i Post Office, Neil Brocklehurst, përshëndeti pagesat e kryera, duke shtuar se “çdo javë, gjithnjë e më shumë persona po marrin pagesën përfundimtare dhe mund të fillojnë të shohin përtej këtij kapitulli të dhimbshëm të jetës së tyre”.
Alan Bates, i cili u nderua këtë vit nga mbreti Charles, muajin e kaluar kritikoi mënyrën sesi po bëhen dëmshpërblimet, duke thënë se shuma që i është ofruar nuk përfaqëson as gjysmën e asaj që kishte kërkuar. Në fillim të janarit, një komision parlamentar e dënoi gjithashtu në një raport kompleksitetin dhe ngadalësinë e mekanizmit të pagesave.
