Shqiptarët në Republikën e Maqedonisë së Veriut ndonëse përbëjnë 29 përqind të popullsisë, ende nuk e kanë arritur nivelin e duhur të përfaqësimit në institucionet shtetërore. Përfaqësimi i drejtë dhe adekuat i shqiptarëve çalon në disa nga institucionet më të rëndësishme shtetërore, shkruan një media shqiptare në RMV..
Nga të dhënat e siguruara rezulton se në Presidencë, Ministrinë për Transformim Digjital, Ministrinë e Sportit, Bankën Popullore, MEPSO dhe Agjencinë e Administratës, shqiptarët janë të nënpërfaqësuar.
Të dhënat e mëposhtme tregojnë se “Balancuesi” u shfuqizua pa e arritur objektivin e plotë, ndërsa Ligji për përfaqësim të drejtë dhe adekuat nuk është miratuar ende.
Që shqiptarët nuk janë të përfaqësuar në mënyrë të drejtë në institucionet e mësipërme e tregojnë të dhënat nga regjistrimi i fundit i popullsisë në vitin 2021.
Koalicioni VLEN, që përfaqëson shqiptarët në qeverinë aktuale, zotohet se përfaqësimi i drejtë dhe adekuat i shqiptarëve në institucionet shtetërore ka qenë dhe mbetet një nga prioritetet kryesore. Sipas tyre, akuzat e opozitës janë të pabaza dhe shpërfaqin një tendencë për të fshehur dështimet e tyre të mëhershme në këtë drejtim.
“VLEN ka ndërmarrë hapa konkrete për të siguruar një barazi reale në përfaqësim dhe integrim të shqiptarëve në të gjitha nivelet e administratës dhe institucioneve publike. Jemi në fazën përfundimtare të përgatitjes së Ligjit për Përfaqësim të Drejtë dhe Adekuat, i cili do të publikohet shumë shpejt për opinionin publik dhe do të parashtrojë mekanizma të qarta dhe të zbatueshme për të garantuar këtë përfaqësim. Ky ligj do të jetë një instrument i fuqishëm ligjor që do të ndalë diskriminimin institucional dhe do të krijojë bazë të qëndrueshme për avancimin e shqiptarëve në institucionet shtetërore. VLEN nuk bën premtime boshe, ne punojmë me vepra dhe transparencë, dhe së shpejti qytetarët do ta shohin këtë përmes ligjit të ri që do të garantojë barazi reale në shtetin tonë”, tha për Portalb.mk, zëdhënësi i VLEN Driton Sulejmani.
Nga ana tjetër, Bashkimi Demokratik për Integrim në vazhdimësi del me reagime publike, ku akuzon koalicionin VLEN për degradimin e pozitës së shqiptarëve në shtet.
Kujtojmë se më 9 tetor 2024, Gjykata Kushtetuese e Maqedonisë së Veriut shfuqizoi mekanizmin e njohur si “Balancuesi”, i cili përcaktonte punësimet në administratën publike sipas përkatësisë etnike, me qëllim promovimin e barazisë etnike dhe përfaqësimin e drejtë të të gjitha bashkësive etnike në institucionet shtetërore. Për momentin, përfaqësimi i shqiptarëve në administratën shtetërore është në një fazë të pasigurtë.
Protagonistët e koalicionit VLEN tash e një kohë të gjatë vazhdimisht dalin me deklarata se është në përfundim procesi i zgjidhjes ligjore për përfaqësimin e drejtë dhe adekuat, që nga shfuqizimi i mekanizmit juridik “Balancuesi”.
