Gjermania, Franca – Britania e Madhe dhe SHBA-të heqin të gjitha kufizimet e rrezes së sulmeve të Ukrainës brenda Rusisë
Kancelari gjerman Friedrich Merz ka deklaruar sot se aleatët perëndimorë nuk po vendosin asnjë kufizim në distancën e veprimit për përdorimin e armëve me rreze të gjatë veprimi të dërguara në Ukrainë kundër objektivave ushtarake ruse.
Merz theksoi se kufizimet janë hequr jo vetëm për armët gjermane, transmeton Telegrafi.
“Nuk ka më asnjë kufizim në distancën e veprimit të armëve të dërguara në Ukrainë, as nga Mbretëria e Bashkuar, Franca, as nga ne. Nuk ka asnjë kufizim as nga SHBA-ja”, tha ai gjatë një forumi diskutimi të organizuar nga kanali WDR.
Ai deklaroi se Ukraina tani mund të “mbrojë veten, për shembull, duke sulmuar objektet ushtarake në Rusi”.
“Deri vonë, nuk mund ta bënte këtë, dhe përveç shumë pak përjashtimeve, as nuk e kishte bërë këtë”, shtoi Merz.
Kancelari gjerman theksoi se ndërsa Kievi po përdor armët e tij për të synuar infrastrukturën ushtarake ruse, Rusia vazhdon të sulmojë “qytetet, kopshtet, spitalet dhe qendrat ukrainase të kujdesit”.
“Rusia sulmon objektivat civile plotësisht pa mëshirë, duke bombarduar qytete, kopshte, spitale dhe qendra për të moshuar – Ukraina nuk e bën këtë”, shtoi Merz.
Ai zbuloi gjithashtu se kjo ishte një nga arsyet e vizitës së tij në Kiev së bashku me udhëheqësit e Francës, Mbretërisë së Bashkuar dhe Polonisë më 10 maj.
Gjatë asaj vizite në kryeqytetin e Ukrainës, ai tha gjithashtu se të gjitha bisedimet e ardhshme për furnizimin me armë me Ukrainën do të mbaheshin konfidenciale.
Në të kaluarën, Ukraina mori raketa me rreze të gjatë veprimi nga SHBA-ja, Mbretëria e Bashkuar dhe Franca, por lejohej t’i përdorte ato vetëm kundër forcave ushtarake ruse në territoret e pushtuara ukrainase.
Sa i përket Berlinit, para se të vinte në detyrë, Merz sinjalizoi se do të anulonte ndalimin e paraardhësit të tij, Olaf Scholz, për dërgimin e raketave Taurus të Gjermanisë, të afta për të goditur objektiva në një rreze veprimi prej 500 kilometrash.
Duke folur të hënën, kancelari gjerman tha: “Askush nuk mund të na qortojë tani që nuk i kemi shteruar të gjitha mjetet diplomatike në dispozicion”.
Heqja e kufizimeve për përdorimin e armëve me rreze të gjatë veprimi do të bëjë “ndryshimin vendimtar në luftën e Ukrainës”, shpjegoi Merz, duke shtuar se “një vend që mund t’i kundërvihet një sulmuesi vetëm në territorin e vet nuk po e mbron veten në mënyrë adekuate”. /Telegrafi/
