Maturantët e shpallur fitues në universitetet publike nisën të regjistrohen. Njëri prej tyre është edhe arkitekti i ardhshëm Gert Isioni, i cili zgjodhi gjyshen që ta shoqëronte. Ndërkohë, ata që kanë fituar në IT dhe Inxhinieri, thonë se zgjedhjen e bënë pasi studiuan tregun e punës.
Ka studiuar shumë për të arritur aty ku është sot: Student në degën e arkitekturës. Gëzimi kur pa emrin e tij në listë, përshkoi gjithë familjen e Gert Isionit, por më e emocionuar duket se ka qenë gjyshja e tij, e cila zgjodhi ta shoqëronte nipin nga Vlora deri në Tiranë.
Gert Isioni: Nuk është se e kam pas pasion por thjesht kam pas qejf vizatimin. Më vonë mendova, pse jo?
Gazetarja: Je shoqëruar nga gjyshja, zgjedhja jote?
Gert Isioni: E të dyve bashkë!
Ndër degët më të preferuara këtë vit kanë qenë teknologjia e informacionit dhe inxhinieritë. Disa prej fituesve thonë se zgjedhjen e bënë vetëm pasi studiuan tregun e punës.
“Kam vendosur të shkoj për “Data Science” dhe për inxhinieri kompjuterike, diplomë e dyfishtë. Kam studiuar edhe tregun por e kam edhe pasion informatikën edhe prandaj vendosa ta ndjek këtë degë”.
“Zgjodha inxhinierinë elektrike. E zgjodha duke parë tregun e punës në Shqipëri edhe jashtë, por edhe me pëlqen shumë”.
Nga kjo e premte e deri më 11 shtator, maturantët fitues në universitetet publike do të mund të kryejnë regjistrimin në fakultetet përkatëse, përmes 7 fazave 48-orëshe.
Çdo maturant i shpallur fitues ka dy ditë kohë për t’u regjistruar, përndryshe vendi i tij i kalon automatikisht një kandidati në pritje.
Pas përfundimit të fazave të para, do të hapet edhe një periudhë çregjistrimi për ata që dëshirojnë të ndryshojnë degën dhe të rikthehen në garë për raundin e dytë.
Më 20 shtator, ata që duan të provojnë sërish për të siguruar degën e tyre do të kenë mundësi të hedhin 10 preferenca të reja. Regjistrimet për raundin e dytë do të zhvillohen nga 29 shtatori deri më 8 tetor.
