Qeveria ka hedhur në konsultim publik një projektligj që parashikon krijimin e Këshillit Fiskal, një institucion i ri i pavarur i cili synon të përmirësojë menaxhimin e financave publike, të rrisë transparencën dhe të forcojë disiplinën fiskale në vend.
Sipas Ministrisë së Financave, kjo nismë është pjesë e reformave për modernizimin e qeverisjes fiskale dhe harmonizimin e saj me standardet e Bashkimit Evropian. Këshilli Fiskal do të veprojë si një organ këshillimor pranë Kuvendit, me mision analizimin e politikave buxhetore dhe mbikëqyrjen e respektimit të rregullave fiskale.
Institucioni do të ketë rol të pavarur në vlerësimin e buxhetit vjetor, kuadrit makroekonomik dhe fiskal afatmesëm, si dhe në identifikimin e rreziqeve që mund të cenojnë stabilitetin financiar të vendit. Ai do të përbëhet nga tre anëtarë me mandate 6-vjeçare, të cilët do të zgjidhen nga Kuvendi përmes një procesi konkurrues dhe transparent.
Për mbështetjen teknike të veprimtarisë së tij do të krijohet një sekretariat me pesë ekspertë, të përzgjedhur mbi bazën e meritës dhe kualifikimeve profesionale. Kjo strukturë do të sigurojë kapacitete të specializuara për analizat fiskale.
Projektligji parashikon gjithashtu publikimin e rregullt të analizave, opinioneve dhe raporteve vjetore të Këshillit Fiskal, me qëllim rritjen e transparencës dhe informimit publik mbi gjendjen e financave shtetërore. Institucioni do të ketë akses në të dhënat e nevojshme nga organet publike, të cilat do të jenë të detyruara të bashkëpunojnë me të.
Kostoja e funksionimit të Këshillit Fiskal vlerësohet rreth 39 milionë lekë në vit dhe do të financohet nga buxheti i shtetit. Ndërkohë, veprimtaria e tij do të gëzojë pavarësi institucionale dhe financiare, ndërsa kontrolli i përdorimit të fondeve do të kryhet nga Kontrolli i Lartë i Shtetit. Synimi kryesor i kësaj nisme është forcimi i besueshmërisë dhe qëndrueshmërisë së politikave fiskale në Shqipëri.
