Kategoria e Parë e futbollit në Shqipëri ka luajtur pesë nga gjashtë ndeshjet e raundit të dytë. Fitore për Burrelin dhe Laçin, ndërsa duelet e tjera të së shtunës u mbyllën në barazim. Raundi mbyllet këtë të diel me Lushnja – Skënderbeu.
Në “Liri Ballabani”, Burreli vendas fitoi 2-0 kundër Kukësit. Golat e Arango dhe Siau në pjesën e parë i dhanë tri pikë vendasve kundër një rivali që ka bërë investime serioze në merkato.
Në fushën e vet, Laçi mposhti 3-1 Kastriotin me përmbysje. Dueli për krutanët u zhbllokua nga Xhafer Hodo, por kurbinasit përmbysën me Traore, Tresa dhe Myrta. Në “Loni Papuçiu” të Fierit, Apolonia barazoi 1-1 kundër AF Luftëtarit. Ishin gjirokastritët ata që kaluan të parët në epërsi me Mërkurin në minutën e 49-të, para se Umejiego të vendoste ekuilibrat katër minuta nga fundi.
Kategoria e Parë, raundi 2 – 30 gusht 2025:
Apolonia 1-1 AF Luftëtari
Burreli 2-0 Kukësi
Iliria 0-0 Pogradeci
Korabi 0-0 Besa
Laçi 3-1 Kastrioti
31 gusht – 17:00
Lushnja – Skënderbeu
