Në këtë ditë, Osmani ka publikuar një video ku ka përmbledhur takime, vizita e pamje nga pjesëmarrja nëpër samite nëpër botë, teksa ka thënë se për këto katër vjet u ka shërbyer qytetarëve.
Një nga deklaratat e përfshirë në këtë video është edhe ajo e Sekretarit të Përgjithshëm të NATO’s, Mark Rutte, i cili gjatë vizitës në Kosovë para disa javësh, ku ndër të tjera tha se “Ju keni një presidente që ka ndikim jo vetëm në Kosovë, por në gjithë rajonin dhe respektohet nga i gjithë Bashkimi Evropian”.
“Çdo ditë, para së gjithash Kosova! Katër vjet në shërbim të qytetarëve. Katër vjet për Republikën! Katër vjet Presidente, betim i përjetshëm për Kosovën! 
”, ka qenë mbishkrimi i Osmanit për këtë video.
Osmani ishte zgjedhur Presidente më 4 prill 2021, me 71 vota për. Ajo kishte fituar në raundin e tretë të votimit, ku kishin marrë pjesë 82 deputetë, teksa kundërkandidat kishte ish-kandidatin për deputet nga lista e Lëvizjes Vetëvendosje, Nasuf Bejtën, i cili nuk kishte marrë asnjë votë.
Seanca ishte bojkotuar nga deputetët e Partisë Demokratike të Kosovës, Aleancës për Ardhmërinë e Kosovës dhe ata të Listës Serbe. Kuorumin për zgjedhjen e Osmanit, asaj ia kishte mundësuar Lidhja Demokratike e Kosovës, pjesë e së cilës kishte qenë më herët.
Osmani e kishte ushtruar detyrën e Presidentit nga 5 nëntori 2020, e deri më 22 mars, pasi ish-Presidenti Hashim Thaçi kishte dhënë dorëheqje nga ky post për shkak të konfirmimit të aktakuzës për krime lufte dhe krime kundër njerëzimit nga Dhomat e Specializuara në Hagë.
Ndryshe, në zgjedhjet e 14 shkurtit, Osmani kishte marrë mbi 300 mijë vota, duke u bërë më e votuara në historinë e Kosovës. Ky rekord i saj është thyer sivjet nga kryeministri Albin Kurti./Reporteri.n
