Kupa e Shqipërisë në volejboll për mesh kuj ka zhvilluar dje gjysmëfinalet e vajtjes. Partizani dhe Tirana morën fitore të pastra, përkatësisht ndaj Skënderbeut dhe Studentit, për tu afruar me finalen. Ndeshja e parë gjysmëfinale ishte në pallatin e sportit “Tamara Nikolla” në Korçë, aty ku Partizani likuidoi Skënderbeun vendës në shifrat 0-3.
Skuadrës së Ylli Tomorrit iu deshën 1 orë e 18 minuta lojë për ta siguruar fitoren, duke vijuar kështu serinë me të gjitha suksese të pastra sezonale në arenën kombëtare. Të kuqtë ishin dukshëm superiorë në të tria setet, duke i fituar ato përkatësisht në shifrat 12-25, 18-25 dhe 19-25.
Braziliani Coutinho me 19 pikë, Raul Sabliqi me 11 dhe Ledion Martiro me 9 udhëhoqën ofensivën e miqve në Korçë. Për Skënderbeun nuk mjaftuan amerikanët Caylor Cox me 19 pikë dhe Tanner Woods, autor i 12 pikëve.
Në gjysmëfinalen e zhvilluar në mbrëmje në pallatin e sportit “Asllan Rusi”, Tirana fitoi derbin kundër Studentin me rezultatin 0-3. Bardheblutë e Arben Sakos i lanë pas krahëve luhatjet e kampionatit, duke zhvilluar një ndeshje mjaft të mirë.
Megjithatë në dy setet e para loja ishte me rivalitet, teksa Tirana fitoi ngushtë fillimisht 23-25 në setin e parë dhe më pas 22-25 në të dytin. Seti i tretë nuk kishte histori, pasi Tirana dominoi në çdo aspekt, duke e marrë në shifra të thella 15-25, për të vulosur suksesin 0-3 në një orë e 18 minuta lojë.
Më datë 25 shkurt do të jetë radha për gjysmëfinalet e kthimit, aty ku Partizani dhe Tiranën do të kërkojnë të kompletojnë kualifikimin, ndërsa Skënderbeu dhe Studenti shpresojnë të përmbysjet e mëdha, për t’i çuar sfidat me “golden” set.
