Presidentja e Kosovës, Vjosa Osmani, ka thirrur mbledhjen e parë të legjislaturës së nëntë të Kuvendit të Kosovës, më 15 prill, pas certifikimit të rezultateve të zgjedhjeve të 9 shkurtit.
Sipas Kushtetutës, e drejta për të propozuar kryetarin e Kuvendit të Kosovës i takon Lëvizjes Vetëvendosje si partia fituese. Megjithatë, PDK-ja ka deklaruar se nuk do ta votojë kandidatin e propozuar nga VV-ja, por gjithashtu nuk do të bllokojë procesin e konstituimit të kuvendit, transmeton IndeksOnline.
Në mbledhjen e Kryesisë së PDK-së, kryetari Memli Krasniqi bëri të ditur se partia e tij është e gatshme të marrë përgjegjësinë për formimin e qeverisë nëse Vetëvendosje nuk arrin të sigurojë shumicën e nevojshme. Kandidati i PDK-së për kryeministër, Bedri Hamza, ritheksoi vizionin e tij për një Kosovë të zhvilluar ekonomikisht dhe më të integruar ndërkombëtarisht.
