Një skandal i ri me shërbimet e sigurisë është në horizont. Dyshime për emërim të paligjshëm të drejtorit të Byrosë për Siguri Publike, Aleksandar Janev, janë bërë publike. Zëdhënësja e LSDM-së, Bogdanka Kuzeska, pyeti nëse drejtori i BSP-së, Aleksandar Janev, nuk i plotëson kushtet për këtë funksion.
“Sipas informatave të publikuara në disa media, është dorëzuar një ankesë anonime në Komisionin Shtetëror për Parandalimin e Korrupsionit (KSHPK), për shkak të dyshimeve të bazuara për paligjshmëri të diplomës së masterit të Janev, të fituar në Universitetin Shkup.
Kjo diplomë është ndër kushtet ligjore bazë për t’u emëruar si drejtor i BSP-së.
Siç është publikuar, në biografinë e tij zyrtare të publikuar në faqen e Ministrisë së Punëve të Brendshme nuk figuron data e saktë kur është marrë titulli ‘magjistër’.
Për më tepër, as në faqen zyrtare të Universitetit të Shkupit nuk ka të dhëna për mbrojtje publike të tezës së masterit. Nuk gjendet asnjë regjistër në sistemet elektronike të universitetit apo të Ministrisë së Arsimit për kontrollin e plagjiaturës.
Të gjitha këto janë të detyrueshme me ligj.
Sipas Ligjit për Veprimtari Kërkimore-Shkencore, çdo tezë masteri duhet të dorëzohet në sistemin për kontroll të plagjiaturës të paktën 30 ditë para mbrojtjes.
Janev është emëruar më 28.6.2024. A është e vërtetë që sistemi nuk ka funksionuar pikërisht gjatë asaj periudhe?”, pyeti Kuzeska.
Sipas saj, këto dyshime hapin pyetje serioze që duhet të marrin përgjigje.
“A e ka zgjedhur Qeveria e VMRO-DPMNE-së për në krye të BSP-së një person që nuk i përmbush kushtet ligjore?
A kemi të bëjmë me falsifikim dokumentesh për interesa partiake?
Pse MPB hesht për këto dyshime të publikuara publikisht?”
LSDM, shton Kuzeska, kërkon përgjigje për këto pyetje dhe një hetim urgjent nga Prokuroria Publike.
Sipas saj, ndërsa opinioni publik ende pret zgjidhje për drejtorin e Agjencisë për Siguri Kombëtare lidhur me certifikatën e tij, tani hapet skandali i dytë në institucionet dhe pozitat më të larta të sigurisë në shtet – Agjencia për Siguri Kombëtare dhe Byroja për Siguri Publike.
Kuzeska thekson se siguria e qytetarëve është vënë në duart e njerëzve partiakë për të cilët është e diskutueshme nëse i plotësojnë kushtet ligjore.
“Kjo është një kërcënim serioz për sigurinë. LSDM do të vazhdojë të zbulojë zëshëm çdo skandal, çdo falsifikim dhe çdo përpjekje për të kapur institucionet në mënyrë të paligjshme.
Funksionimi i shërbimeve të sigurisë nuk duhet të jetë viktimë e një shteti partiak që VMRO-DPMNE po përpiqet ta instalojë sërish”, thekson ajo.
