Ka përfunduar numërimi i votave të raundit të dytë të zgjedhjeve lokale në Maqedoninë e Veriut, që u mbajtën një ditë më parë në 33 komuna, përfshirë Shkupin, pasi kaluan në balotazh më 19 tetor.
Rezultatet përfundimtare konfirmuan epërsinë e VMRO–DPMNE-së, partisë së Hristijan Mickoskit, e cila fitoi 22 komuna, përfshirë kryeqytetin Shkupin. Aleatja shqiptare, VLEN, siguroi 4 komuna (Bogovinjë, Dibër, Dollneni dhe Tetovë), duke mposhtur në dy prej tyre kandidatët e AKI-së të udhëhequr nga Ali Ahmeti.
Koalicion AKI fitoi vetëm një komunë, Studeniçanin. Ndërkohë, ky raund shënoi një tjetër goditje për partinë në opozitë LSDM, e cila fitoi vetëm 3 komuna, ndërsa në Strugë triumfoi kandidati i pavarur Mendi Qyra. Një komunë u fitua nga Unioni i Romëve dhe një tjetër nga Lëvizja ZNAM.
Në raundin e parë, AKI fitoi 5 komuna: Vrapçisht, Gostivar, Lipkovë, Pllasnicë dhe Çashkë, ku për herë të parë kryetar komune do të jetë një shqiptar, Suat Shaqiri. Ndërsa VLEN mori vetëm një komunë. 15 komuna siguroi në raundin e parë partia e kryeministrit Mickoski.
