Golat e pësuar nga skuadra e Partizanit në ndeshjet e fundit të kampionatit tashmë kanë nisur të bëhen shqetësuese. Reparti difensiv duket se ka humbur sërish busullën dhe është rikthyer te golat e pësuar për gabime individuale lehtësisht të shmangshme, sidomos nëse përqendrimi do të ishte maksimal. Janë gjashtë gola që Partizani ka marrë në tre ndeshjet e para të kësaj faze të katërt, duke pësuar në secilën prej këtyre ndeshjeve nga dy gola.
MBROJTJA “FUT UJË”- Nëse në takimet ndaj Vorës (2-2) dhe Teutës (2-2) ekipi ia doli të shmangë humbjen, në ndeshjen me Vllazninë kjo ishte e pamundur, teksa shkodranët fituan në kryeqytet me rezultatin 0-2, duke vendosur në vështirësi Partizanin që tashmë sheh Dinamon e vendit të pestë t’i afrohet me vetëm një pikë diferencë. Sigurisht, paraqitja e Partizanit në tërësi ndaj Vllaznisë nuk ishte negative dhe për t’u hedhur në tokë, mirëpo golat lehtësisht të evitueshëm po dënojnë skuadrën në garën Kalendari për pjesën e fundit të kampionatit, “Demat” nisen si favoritë për objektivin sezonal. Kujtojmë se ecuria pozitive e Partizanit në fazën e tretë, ku të kuqtë arritën edhe pesë fitore radhazi, kishte për bazë repartin difensiv që, së bashku me portierin Qirko, i vendosën “drynin” portës së tyre. Në atë vazhdimësi prej pesë fitoresh, Partizani pësoi vetëm dy gola, edhe pse përballë pati ekipe të forta si Egnatia apo Dinamo.
REAGIMI- Tashmë, Partizanit i duhet të rikthejë të njëjtin përqendrim në mbrojtje për të shmangur të tjerë hapa fals që më pas do të “hidhnin në erë” sezonin e të besuarve të trajnerit Oltijon Kërnaja. Ndeshja e radhës ndaj Elbasanit do të jetë një provë force në këtë drejtim, pasi me verdheblutë kryeqytetasit janë ndeshur në pesë raste përgjatë këtij sezoni mes kampionatit dhe Kupës, e bilanci flet për Elbasanin, që i eliminoi nga Kupa dhe në kampionat ka fituar një ndeshje e ka marrë dy barazime, duke mos humbur asnjë takim në Superiore me të kuqtë. Aq më tepër kur kjo provë force vjen në momentin kur pikërisht në mbrojtje, për Partizanin në këtë ndeshje, do të mungojë një nga elementët kryesorë të repartit difensiv si David Atanaskoski, që mban edhe shiritin e kapitenit.
GOLAVARAZHI– Aktualisht, Partizani ka kaluar në një golavarazh negativ, duke rezultuar me një handikap prej dy golash, teksa ekipi ka shënuar 33 gola në 30 javë kampionat, por ka pësuar 35 të tillë. Një statistikë domethënëse që tregon problemet e të kuqve këtë sezon në mbrojtje, teksa asnjë nga skuadrat e renditura në katërshen e parë nuk ka një bilanc negativ në golavarazh, madje as Dinamo e Teuta që renditen në vendin e katërt dhe të pestë. Gjithsesi, kampionati ka edhe gjashtë javë të mbetura dhe te Partizani kanë ende kohë për të rikuperuar këtë disavantazh e për t’u rikthyer solidë dhe te rruga e fitoreve, për të mbrojtur deri në fund vendin e katërt që garanton pjesëmarrjen në “Final Four”, që ishte edhe objektivi fillestar i Partizanit në këtë sezon, duke ditur nisjen e keqe të kampionatit në javët e para.
