Qeveria amerikane është mbyllur për një periudhë rekord prej 36 ditësh, mbyllja më e gjatë në histori, ndërsa miliona amerikanë vuajnë efektet e shkurtimeve të programeve federale, vonesave të fluturimeve dhe mungesës së pagave për punonjësit federalë në të gjithë vendin.
Presidenti Donald Trump po refuzon të negociojë me demokratët mbi kërkesat e tyre për të ruajtur subvencionet e sigurimeve shëndetësore derisa ata të bien dakord të rihapin qeverinë, siç kërkon ai .
Por demokratët skeptikë vënë në pikëpyetje nëse presidenti republikan do ta mbajë fjalën e tij, veçanërisht pasi administrata ndërpreu ndihmën ushqimore pavarësisht urdhrave të gjykatës për të mbajtur fondet në dispozicion për të parandaluar urinë.
Me Trumpin kryesisht të lënë mënjanë, bisedimet janë intensifikuar midis një koalicioni të lirshëm senatorësh të qendrës që përpiqen të negociojnë një fund të këtij ngërçi.
Pritjet janë të larta se do të gjendet një rrugëdalje nga ngërçi pas rezultateve të zgjedhjeve të së martës, të cilat shihen gjerësisht si një tregues i ndjenjës së votuesve ndaj mandatit të dytë të Trump në Shtëpinë e Bardhë.
Demokratët kanë fituar zgjedhjet kyçe për guvernator në Virxhinia dhe Nju Xhersi, si dhe kryetarin e bashkisë në Nju Jork, gjë që me siguri do të ndikojë në vlerësimet politike.
