Lajm i keq për Medon Berishën dhe klubin e tij, Lecce. Mesfushori shqiptar do të mungojë për pesë deri në gjashtë javët e ardhshme, pas dëmtimit të pësuar në ndeshjen kundër Pisas pesë ditë më parë. Lojtari u detyrua të largohej herët nga fusha për shkak të një dëmtimi muskulor dhe u transportua me barelë, duke shkaktuar shqetësim te stafi teknik dhe tifozët.
Sipas ekzaminimeve mjekësore të publikuara nga klubi verdhekuq, Berisha ka pësuar një dëmtim muskulor të shkallës së dytë, i cili do ta mbajë jashtë fushave për të paktën 40 ditë. Rikthimi i tij pritet jo më herët se fundi i janarit 2025.
Si pasojë, 22-vjeçari do të mungojë në disa sfida të rëndësishme të kampionatit, përfshirë përballjet ndaj Comos, Juventusit, Romës, Parmës, Interit, Milanit, Lazios dhe Torinos. Dëmtimi erdhi në një moment shumë pozitiv për Berishën, i cili ishte shndërruar në një titullar të padiskutueshëm në Serie A.
Para ndalesës së detyruar, Berisha kishte fituar tre herë çmimin “Lojtari i Ndeshjes”, duke konfirmuar formën e tij të shkëlqyer. Ai kishte luajtur 13 nga 15 ndeshjet e këtij sezoni, me 2 gola dhe 3 asistime, statistika që e rendisin ndër lojtarët më efektivë të skuadrës puljeze.
Mesfushori pritet të jetë i gatshëm për kombëtarja shqiptare dhe trajnerin Sylvinho në ndeshjet play-off në rrugën drejt Kupës së Botës 2026.
