ANATOMIA E NJË ÇASTI
Titulli: Anatomia e një çasti
Autor: Javier Cercas
Kategoria: Histori, Roman
Përktheu: Bashkim Shehu
Botues: Dudaj
Çmimi: 1500 lekë
Javier Cercas dëshiron të rrëfejë, në formën e një romani, përpjekjen për grusht shteti të 23 shkurtit 1981 në Spanjë. Por ai zbulon se, “për një herë të vetme, historia ka qenë koherente, simetrike dhe e rregullt, jo e çrregullt, rastësore apo e paparashikueshme”. Në atë realitet, Cercas sheh “tërë forcën dramatike dhe potencialin simbolik që kërkojmë nga letërsia”.
Me një gjest të madh guximi, ai vendos të heqë dorë, ose, ndoshta, të bëjë sikur heq dorë, nga trillimi letrar, për të realizuar Anatomia e një çasti dhe për të paraqitur faktet: kolonelin Tejero që hyn i armatosur në Parlamentin e Madridit; plumbat që fishkëllejnë në sallën e Cortes-it; politikanët që kërkojnë strehë nën tavolina. Të gjithë, përveç tre personave që mbeten ulur në vendet e tyre për t’u përballur me puçistët. Kështu zbulojmë se “faktet e zhveshura” nuk janë aspak të thjeshta, sepse ato përmbajnë brenda vetes jo vetëm realitetin, por edhe interpretimin dhe mënyrën e rrëfimit të tij.
“Një nga kryeveprat e letërsisë bashkëkohore spanjolle… Cercas ka ditur të ndriçojë një moment vendimtar në historinë e Spanjës… Lexuesi e di se ngjarja e rrëfyer është e vërtetë, por, falë mjeshtërisë letrare të Cercas-it, ai e percepton të vërtetën si fryt të një imagjinate prej romani.”, e cilëson Alberto Manguel.
Javier Cercas ka lindur në vitin 1962 në Ibahernando, Cáceres. Është profesor i letërsisë spanjolle në Universitetin e Gironës dhe bashkëpunon rregullisht me El País. Në vitin 2011, Anatomia e një çasti fitoi Çmimin Ndërkombëtar të Letërsisë “Mondello” dhe Çmimin e Panairit Ndërkombëtar të Librit të Torinos.
Libra të tjerë të Javier Cercas në shqip janë edhe “Ushtarë të Salaminës”, “Mashtruesi” dhe “Monarku i hijeve”.
ARLINDA DUDAJ, BOTUESE
AUTORI I NJOHUR ARAB, NË SHQIP POEZITË E DARWISH
Titulli: Mos kërko falje për çfarë ke bërë
Autori: Mahmoud Darwish
Përktheu: Agron Islami
Kategoria: Poezi
Botues: Dudaj
Çmimi: 1400 lekë
Mahmoud Darëish-i konsiderohet një nga shkrimtarët dhe poetët më të rëndësishëm palestinezë, arabë dhe ndërkombëtarë, emri i të cilit lidhet fort me poezinë e revolucionit dhe atdheut, dashurisë, lirisë dhe romantizmit. Njihet si një nga autorët që ndikoi në përparimin e poezisë moderne arabe dhe futjen e simbolizmit në të. Për profesorin palestinez amerikan Edëard Said, i Universitetit të Columbia-s në Nju Jork, Mahmoud Darwish është poeti më i shkëlqyer arab, me një famë të padiskutueshme në Palestinë dhe Izrael, vendi ku ai u rrit, por prej nga u largua në mërgim në vitin 1970.
VASIL YMERI, AUTOR
NJË RRËFIM PËR SFIDAT E JETËS, ROMANI AUTOBIOGRAFIK I YMERIT
Titulli: Një jetë, një humbje, një faj
Autori: Vasil Ymeri
Kategoria: Roman
Botues: Muza
Çmimi: 1000 lekë
Gabrieli, një djalë i ri plot jetë, përballet që në moshë të re me dhimbjen dhe sfidat e jetës. Uendi, vajza e bukur dhe shkrimtarja e pasionuar, hyn papritur në botën e tij dhe ia rrëmben zemrën. Por pas çdo buzëqeshjeje të saj fshihet një pavendosmëri që rrezikon gjithçka.
Dy shpirtra që takohen për të përjetuar dashurinë, por edhe për t’u ballafaquar me plagët më të thella. Kush do ta mbajë peshën e humbjes? Kush do të gjykohet për gabimet? Dhe mbi kë do të rëndojë ndërgjegjja e një vendimi që ndryshon gjithçka?
Ky është libri i parë i autorit dhe në të të ka nota të thella autobiografike.
MELODIA E VARGUT
Sonila Strakosha
Te “Melodia e Vargut” vjen poezia Perëndesha e udhës sime nga Sonila Strakosha
Je drita që mua më dhe dritën,
Në frymën e parë të ndjeva ty.
Ledhatim nëne, prekja më e butë,
Ëmbëlsi pranie sa çela sytë.
Je në piedestalin e ndjenjës,
Në madhështinë e mirësisë.
Në bekimin e çdo rinisjeje,
Në çdo agim, çdo perëndim.
Asgjë s’do të qe njëlloj pa ty
Ajo hedhje hapi, guxim, vendim.
Gjithçka bëra, me e pa dashje,
E dija se ti ishe diku aty.
Je dora që kam kaherë mbi sup,
Vështrimi që sheh dhe milje larg.
Zëri yt jehon dhe kur na ndajnë dete,
Je zemra që rrahjen ia kam me vete.
Shkëlqimi që më fal diellin e lartësive,
Dhe diellin tjetër që të shndrit në deje,
Por dhe hënën, yjet, e botën e tërë
Janë dhuratë nga ti, i shoh falë teje.
Je kujdes, erë e mirë shtëpie,
Qortim e përkrahje që s’ndal.
Je shëmbëlltyrë dhembshurie,
Dhe kur s’flet mëkon, pa fjalë.
Je mrekullia e dhimbjes sime,
E gëzimit, ëndrrës, gjithashtu.
Kryeson gjenezën e çdo arritjeje
Asgjë s’do të qe njëlloj pa ty.
Udhërrëfyesja e jetës sime,
I ke veshur pëlhurën e dashurisë.
Përmendorja nga rrjedh uji i bekuar,
Nga buron paqja edhe kur ka zhurmë.
Je fjala e mirë, urë mbi lum të egër,
Beton i patundur në tërmete ndjenjash.
Sado e fortë të jetë lëkundja,
Streha jote do të jetë më e sigurta.
Je melodi e butë, ninullë jete,
Himn i fuqishëm force gjithashtu.
Frymëzimi në çdo kompozim dite
Asgjë s’do të qe njëlloj pa ty.
Të falem për ditët kur të lëndova,
Për netët, sa shumë ato të pagjuma.
Të falem për flokët e bardhë që të shtova,
Dhe për tërë lutjet e pathëna.
Të falem ty si Shën Mërisë,
Që me duar nëne më ke qëndisur,
Se përveç saj, Hyjnores lart në qiell,
Më je Shën Mëri në tokë
O shpirt i bukur!
