Organizata e Veteranëve të Luftës së UÇK-së përmes një postimi në Facebook tha se kategoritë e dala nga lufta e UÇK-së po e ndjekin me shqetësim të madh ngërçin e krijuar rreth konstituimit të Kuvendit të Kosovës.
Kjo situatë e krijuar së fundmi, ku janë bërë 48 tentime për konstituim, sipas OVL-UÇK-së, tregon qartë se partitë politike nuk kanë vullnet të sinqertë për të gjetur një zgjidhje dhe për të dalë nga ky bllokim institucional.
“OVL, SHIL dhe SHFD të UÇK-së u bën thirrje të gjitha partive politike, me theks të veçantë partisë së parë që ka dalë fituese nga zgjedhjet e fundit parlamentare, që urgjentisht të gjejnë zgjidhje për konstituimin e institucioneve, sepse kjo situatë është e papranueshme për ne si kategori të dala nga lufta dhe të gjithë qytetarët e vendit”.
“Gjykata Kushtetuese, si organi më i lartë juridik në vend, ka dhënë një vendim të qartë: Kuvendi i Kosovës duhet të konstituohet deri më 26 korrik 2025. Moszbatimi i këtij vendimi përbën shkelje të drejtpërdrejtë të Kushtetutës së Republikës së Kosovës”.
“Ne nuk po kërkojmë privilegje. Ne nuk po kërkojmë favore politike. Ne po kërkojmë vetëm një gjë: zbatimin e Kushtetutës së Republikës së Kosovës. Nëse ky vend nuk funksionon mbi bazën e Kushtetutës, atëherë për çfarë kemi luftuar ne? Nëse institucionet nuk respektojnë vendimet e Gjykatës Kushtetuese, atëherë kush tjetër duhet t’i respektojë ato para tyre”, thuhet në njoftim.
Tutje, në atë njoftim thuhet se ata nuk do të qëndrojnë duarkryq dhe se shteti s’mund të mbahet peng nga asnjë individ, përcjell Klankosova.tv.
“Shteti nuk mund të mbahet peng nga asnjë individ, qoftë ai edhe Kryeministër. Nëse deri më 26 korrik nuk ka reflektim nga partitë politike për ta zgjidhur këtë situatë, ne si kategori të dala nga lufta e UÇK-së nuk do të qëndrojmë duarkryq. Kosova është ndërtuar me gjakun e bijve dhe bijave më të mirë të këtij populli, dhe ne nuk do ta lejojmë askënd të nëpërkëmbë këtë sakrificë”, thuhet tutje në njoftim./Klankosova.tv
