SPB Shkup, për shkak të dyshimit të bazuar për kryerjen e veprave penale të “kryerjes së pakujdesshme të detyrës”, sipas nenit 353, paragrafi 1 i Kodit Penal të Republikës së Maqedonisë, ngriti kallëzim penal në Prokurorinë Publike kompetente kundër V.S. dhe B.A., ish-drejtorëve të përgjithshëm të Postës së Maqedonisë së Veriut në pronësi shtetërore Shkup, transmeton Portalb.mk.
“Sipas gjetjeve nga veprimet e gjera hetimore të ndërmarra, të pandehurit nuk kanë ushtruar mbikëqyrjen e duhur mbi punën e menaxherëve të tyre vartës të degëve në kompani gjatë vitit 2023, duke lejuar kështu që të ndërmerren veprime në kundërshtim me nenin 40, paragrafi 6 i Ligjit për Prokurimin Publik, dhe në lidhje me nenin 9, paragrafi 1, pika d e këtij ligji, i cili përcakton se autoritetet kontraktuese në këtë aktivitet sektorial mund të kryejnë prokurime pa një procedurë prokurimi publik që nuk mund të kalojë shumën prej 24,000 eurosh. Në këtë mënyrë, ata praktikisht mundësuan kryerjen e prokurimeve pa një procedurë prokurimi publik në shumën totale prej 56,546 eurosh, që përfaqëson tejkalimin e pragut të parashikuar dhe të lejuar të prokurimeve të kryera pa një procedurë prokurimi publik, në shumën totale prej 32,546 eurosh. Një shumë për të cilën të pandehurit dëmtuan buxhetin e SHA Posta e Maqedonisë së Veriut”, njoftojnë nga MPB.
Bazuar në inicialet e publikuara nga MPB, dyshimet për veprën penale të “kryerjes së pakujdesshme të detyrës” bien mbi Vasko Stefanov dhe Bujare Abazi, ish-drejtorë të përgjithshëm të Postës së Maqedonisë së Veriut gjatë vitit 2023.
Abazi pas shkarkimit nga pozita e drejtoreshës së Postës, në maj të këtij viti u zgjodh anëtare dhe kryetare e Komisionit për Letrat me Vlerë.
Vasko Stefanov nga ana tjetër, derisa ishte drejtor në Postë hapi konkurs për punësimin e 31 administratorëve, derisa Sindikata ankohej se Posta gjendej në gjendje të mjerueshme, nuk kishte paga të rregullta, nuk kishte postierë, ndërkaq publikonte shpallje për administratorë për të cilët nuk ka nevojë, sindikalistët thonin se nuk ka nevojë.
Gjithashtu, Stefanov akuzohet në rastin ‘Aditiv’, së bashku me 32 persona fizikë dhe 5 persona juridikë se me vetëdije në periudhën 13.04.2023-23.08.2024 si ish-drejtori i EMV-së, së bashku me zyrtarë të tjerë kanë krijuar grup që kanë keqpërdorur thirrjet publike, kontratat publike-private, pozitën zyrtare dhe autoritetin dhe kanë shpërlarë para, vepra të dënueshme në bazë të Kodit Penal.
Ka disa vite që Posta e Maqedonisë së Veriut përballet me shumë probleme. Organizimi dhe menaxhimi i dobët i Postës në gjithë territorin e Maqedonisë së Veriut, mungesa e digjitalizimit, puna manuale dhe gabimet njerëzore në raportet financiare, mungesa e një sistemi të njëjtë të punës dhe punëtorë të papërgjegjshëm që nuk shkojnë në punë. Këto gjetje skandaloze gjatë vitit 2024 ishin disa nga problemet e përshkruara Studimi i Fizibilitetit të Postës së Maqedonisë së Veriut të kryer në vitin 2021 për të cilin shteti ka paguar afër 800 mijë euro.
Portalb.mk atëkohë, në bazë të Ligjit për Qasje në Informata me Karakter Publik dërgoi kërkesë për të analizuar studimin që gjendet te Qeveria e Maqedonisë së Veriut dhe te Posta e Maqedonisë së Veriut. Nga të dy palët na u mundësua qasja te studimi i fizibiliteti, mirëpo nuk na u lejua të marrim një kopje të studimit për shkak se nuk ishte në formë të digjitalizuar dhe Posta kishte vetëm një kopje të saj.
Sipas studimit, Postës i mungonte organizimi i punës dhe menaxhimi efikas. Sipas studimit, udhëheqësit e njësive postare, drejtorët nuk i kryejnë kompetencat e tyre për t’i angazhuar punëtorët me gradë më të ulët. Në fakt, thuhej se njësitë postare të shpërndara në vend funksionojnë si njësi të pavarura dhe punën e tyre e kryejnë në mënyra të ndryshme dhe jo me një sistem të caktuar, pra, çdo qytet punon me praktika të ndryshme.
