Policia e Kosovës bën thirrje që votuesit të mos fotografojnë apo incizojnë fletët e votimit, pasi kjo vepër është ligjërisht e ndaluar dhe cënon fshehtësinë dhe integritetin e procesit zgjedhor.
Sipas Policisë, janë pranuar informacione se disa persona, të lidhur me radhët e Listës Serbe, mund t’u kërkojnë votuesve përfshirë votues serbë që të dokumentojnë votën e tyre brenda kabinës së votimit me telefona ose pajisje të tjera. Autoritetet njoftojnë se do të ketë angazhim maksimal për të parandaluar dhe ndëshkuar veprime të tilla.
Policia rikujton se në të kaluarën shumë qytetarë janë përballur me pasoja ligjore për shkak të fotografimit të votës, veprim që është përdorur për të provuar se votuesit kanë votuar nën presion ose sipas udhëzimeve të tjetrit.
Apeli përfundimtar: mos e fotografoni fletën e votimit — votoni lirshëm dhe fshehtas sipas vullnetit tuaj.
