Një godinë e re moderne, me mbi 7 000 m² hapësira funksionale, do të jetë ajo e Qendrës Kombëtare të Kulturës për Fëmijë ku po punohet intensivisht në mënyrë që të jetë gati vitin e ardhshëm. Projekti parashikon një skenë të dyfishtë brenda godinës dhe jashtë, në formën e një amfiteatri në natyrë.
“Vitin e ardhshëm godina e re e QKKF-së do të jetë një godinë gjigante prej 10 katesh tek ish Garda e Liqenit. Godina e re e QKFF-së do të jenë një godinë e re super moderne, me një skenë që shtrihet në dy kate dhe do të jetë në formën e një amfiteatri. Skena është lëvizëse dhe nga brenda kalon në ambientin jashtë. Vitin e ardhshëm, fëmijë dhe prindërit do të kenë mundësi të shohin shfaqje shumëdimensionale dhe brenda në skenë, edhe jashtë saj.”, – thotë për “Report TV”, Melsi Qirici, drejtore e Teatrit të Kukullave.
Ajo tregon se brenda qendrës do të ketë ambiente të tjera, auditorë dedikuar për fëmijët, salla për ekspozitat, klasa për balet dhe për inovacion. Për herë të parë do të futet edhe kursi i gatimit. Ndërkohë, deri në përfundimin e qendrës së re të fëmijëve, aktivitetet nuk ndalojnë. Këtë fundjavë, në mjediset e Teatrit të Kukullave kanë nisur regjistrimet për të gjitha kurset e artit, ndërsa nga 1-7 shtator do të organizohen ditë të hapura me fëmijët.Shtatori shënon fillimin e sezonit të ri për Teatrin e Kukullave.
“Premiera absolute të cilën mezi po e presin fëmijët dhe të rriturit është ‘Zemërimi i shkronjave’, një shfaqje, e cila do të vijë e rikonceptuar, e risjellë për fëmijët. Ajo ka dhe përvjetorin e krijimit këtë vit.”, – shpjegon Qirici.
Një tjetër shfaqje do të jetë edhe ‘Libri i xhunglës’, që do të vijë për herë të parë në një format madhështor sa i përket anës teknologjike.
“Për herë të parë për fëmijët do të vijë një shfaqje, ku do të projektohet 360 gradë me projeksione shumë moderne të një teknologjie të lartë. Do të duket sikur je brenda në një xhungël dhe është një tjetër risi, që do t’i vijë teatrit.”
Ndërsa në dhjetor përveç aktiviteteve të QKKF-së, do të ketë shumë shfaqje dedikuar festave të fundvitit dhe surpriza më e madhe do të jetë 75-vjetori i teatrit, për të cilin do të bëhet një festë e madhe dedikuar fëmijëve.
Periudha e verës, nga ana tjetër ka qenë një periudhë aktive për artistët e Teatrit të Kukullave, pasi ata kanë udhëtuar me shfaqje në qytete të ndryshme të vendit. Dita e fundit e turit është përmbyllur me Lezhën mbrëmjen e së martës.
