Një natë zjarri, që mund të shkrumbojë urat e brishta të paqes. Vladimir Putin vendosi të injorojë kujdesin e imponuar nga negociatat me Donald Trump dhe të shfryjë një demonstrim force masiv e brutal. Sulmi kundër Kievit ishte vetëm kapitulli më i përgjakshëm i një operacioni kompleks, që goditi shumë objektiva civilë e ushtarakë të zgjedhur me kujdes një nga një: shpërthimet e raketave dhe dronëve dërguan një mesazh të qartë qeverisë së Zelenskyt dhe aleatëve të tij, duke i vënë përballë një skenari përshkallëzimi. Kremlini iu përgjigj valës së inkursioneve ukrainase kundër rafinerive, që pengojnë furnizimet me benzinë në Rusi dhe që vijuan edhe të mërkurën me dy impiante të tjera të djegura, duke konkretizuar një kërcënim gjithëpërfshirës.
Breshëria e bombave fluturuese dërguar për të bërë kasaphanë në pallatet e banimit të kryeqytetit u shoqërua nga një sërë veprimesh të synuara, të gjitha me një vlerë të qartë simbolike. U hodh raketa që shkatërroi godinën ku ndodheshin zyrat e delegacionit të BE-së dhe selia e Këshillit Britanik, por ndoshta edhe më domethënës ishte sulmi i kryer brenda Deltës së Danubit, pak metra nga kufiri i Rumanisë dhe pra i Europës: një dron detar rus depërtoi në lumë për dhjetëra kilometra dhe qëlloi “Simferopol”-in, një nga të paktat anije të mbetura të marinës së Kievit, e specializuar në spiunazh elektronik dhe e përdorur më parë nga agjentët sekretë për sulme kundër porteve të Krimesë. Videoja e shpërndarë nga Moska nuk lë dyshime mbi dëmet e shkaktuara dhe mbi pozicionin, pranë kufirit dhe përgjatë një prej rrugëve të përdorura për të përcjellë mallra e armë perëndimore drejt Odesës.
Po aq domethënës është bombardimi i fabrikës së ngritur në periferi të kryeqytetit nga Bayraktar, kompania turke e mjeteve ajrore pa pilot në pronësi të dhëndrit të Erdogan-it, ende e painaguruar. Dy raketa hipersonike Kinzhal kapërcyen mburojën e Patriot-ëve dhe shkatërruan depot: zjarri vazhdoi gjithë ditën, me kolona tymi të dukshme në të gjithë metropolin. Ashtu si në sulmin e javës së kaluar kundër degës ukrainase të një industrie amerikane – dhe të tjerëve të mbetur sekret – Kremlini paralajmëron kështu shoqëritë e huaja të gatshme të mbështesin prodhimin ushtarak ukrainas dhe të kontribuojnë tek thumbat e “Iriqit prej Çeliku” të evokuar nga Ursula von der Leyen në tryezën e bisedimeve
Municionet e hedhura mbi magazinën e lokomotivave dhe trenave interpretohen si një paralajmërim për gjeneralët e Zelenskyt, të cilët ditët e fundit për herë të parë kanë synuar linjat hekurudhore ruse në territoret e pushtuara për të prishur përgatitjet e një ofensive të re tokësore. Deri tani trenat kanë qenë praktikisht imunë ndaj egërsisë së luftës, duke garantuar lidhjet jetike të Ukrainës dhe furnizimet për forcat pushtuese: tani edhe kjo armëpushim i heshtur mund të zhduket. Po aq e padiskutueshme është edhe vlera terroriste e bombave Shahed-Geran të lëshuar mbi lagjet e Kievit, ku valët e njëpasnjëshme penguan punën e zjarrfikësve dhe shpëtimtarëve: agimi erdhi nën një qiell të zi nga tymi i dhjetëra zjarreve që mbysi shpresat për paqe të një populli të lodhur nga dyzet muaj luftë totale, që nuk mbështetet më tek ndihma amerikane dhe sheh situatën në front të përkeqësohet.
Barriera e mbrojtjes ajrore tregoi kufijtë e saj, të rënduar nga mungesa e raketave moderne tokë-ajër: marrëveshja për shitjen e Patriot-ëve amerikanë të paguar nga vendet europiane ka procedura të ngadalta, që ende nuk kanë sjellë dorëzimin e asnjë municioni. Ushtarakët ukrainas pretendojnë se kanë ndalur pjesën më të madhe të inkursorëve, por pamjet e shkatërrimit tregojnë një realitet tjetër. Për nga numri i municioneve ishte ofensiva e dytë ajrore më e madhe ndonjëherë: raketa hipersonike, balistike, cruise dhe dronë u përdorën me manovra të koordinuara për të arritur rezultatin më vdekjeprurës. Arsenalet e Putinit janë të mbushura dhe mund të përsërisin të njëjtën stuhi brenda pak ditësh./La Repubblica
