Deri në fund të vitit të kaluar, familja e Jair Bolsonaro dukej politikisht e “vdekur”. Ish-presidenti ndodhej në burg, ndërsa djali i tij Eduardo Bolsonaro, i konsideruar si trashëgimtari i mundshëm politik, ishte përjashtuar nga Kongresi dhe jetonte në mërgim. Por situata ka ndryshuar ndjeshëm në vetëm pak muaj.
Në prag të zgjedhjeve presidenciale në Brazil, familja Bolsonaro duket se po orkestron një rikthim në skenën politike. Në qendër të këtij rikthimi është djali i madh, Flávio Bolsonaro, i cili është shfaqur si një kandidat serioz dhe konkurrues.
Sipas sondazheve të fundit, ai rezulton në garë të ngushtë – madje në disa raste përpara – ndaj presidentit aktual Luiz Inácio Lula da Silva.
Pakënaqësia e votuesve për situatën ekonomike dhe rritja e shqetësimeve për kriminalitetin duket se po krijojnë terren të favorshëm për opozitën, duke i dhënë një mundësi reale rikthimi familjes Bolsonaro në pushtet.
