Rrëshqitja e tokës në Vodno sot mblodhi në një takim urgjent koordinues përfaqësuesit e Komunës Qendër, Qendrës për Menaxhim të Krizave dhe përfaqësues të disa institucioneve dhe shërbimeve.
Nga Qendra për Menaxhim me Kriza thonë se takimi u thirr për shkak të rrëshqitjes së dheut në Vodno, në afërsi të rrugëve Belgradska dhe Partenie Zografski.
“Institucionet pjesëmarrëse e shqyrtuan gjendjen në terren, rreziqet për objektet përreth dhe nevojën për ndërmarrjen e masave urgjente për stabilizimin e zonës kritike. U dakordua veprim i përbashkët dhe i koordinuar, mbikëqyrje e shtuar dhe përgatitja e një plani urgjent me qëllim parandalimin e rrëshqitjes së mëtejshme të dheut. Konkluzionet nga takimi do t’i përcillen zyrtarisht Qeverisë së Republikës së Maqedonisë së Veriut për veprim të mëtejshëm”, informuan nga QMK.
Problemi me rrëshqitjen e dheut në Vodno, veçanërisht në zonat ku në vitet e fundit ka pasur urbanizim të madh, është prezent prej kohësh. Një pjesë e murit mbajtës pas Klinikës së Sëmundjeve të Fëmijëve u shemb vitin e kaluar në qershor, ndërsa në tetor u njoftua se Ministria e Shëndetësisë duhet të fillojë ndërtimin e një muri mbajtës të ri si zgjidhje e përkohshme.
Zgjidhja e përhershme detyronte Qytetin e Shkupit të përgatiste studim të ri hidrologjik dhe studim për mbrojtjen e ujërave nëntokësorë në shpatet e Vodnos, në koordinim me institucionet përgjegjëse të tjera, bazuar në të cilin do të ndërmerren masa për ndërtimin e një rruge të re me rrjetin e nevojshëm të kanalizimeve dhe asfaltimin e saj.
Një pjesë e rrjetit të kanalizimeve që përmban ujerat nga Vodno është shkatërruar ose mbuluar për shkak të urbanizimit të madh gjatë dekadës së fundit, ndërsa vetëm një pjesë vazhdon të mirëmbahen dhe funksionojnë, por nuk ka kapacitet të mjaftueshëm.
Ndryshe, të reshurat e intensifikuara, ujërat e lumenjve dhe toka e tejngopur me lagështi e rrisin rrezikun nga përmbytjet në gjithë Maqedoninë e Veriut në ditët në vijim, njofton Drejtoria për Punë Hidrometeorologjike, e cila ka aktivizuar hidroalarmin për vërshime.
