Qeveritë e Meksikës dhe Shteteve të Bashkuara nënshkruan të enjten një memorandum mirëkuptimi për të financuar dhe përshpejtuar disa projekte për trajtimin e ujërave të ndotura në pellgun e lumit Tijuana.
Ujërat e ndotura të patrajtuara vazhdojnë të ndikojnë banorët që jetojnë përgjatë lumit, i cili kalon kufirin nga Tijuana dhe përshkon disa nga lagjet jugore të San Diegos. Banorët përgjatë këtij lumi prej kohësh përballen me probleme serioze shëndetësore, që sipas studiuesve vijnë nga ndotja e tij.
Një grup studiuesish nga Universiteti i Kalifornisë në San Diego zbuloi se sasi të vogla të kimikateve të përhapura nga uji – të tilla si ato nga gomat, produktet për kujdesin personal dhe madje edhe droga të paligjshme – janë duke u shpërndarë në ajër, duke përkeqësuar problemet shëndetësore për dhjetëra mijëra banorë që jetojnë në afërsi të lumit.
Gjatë ngjarjes së së enjtes në Mexico City, Sekretari i Agjencisë për Mbrojtjen e Mjedisit të SHBA-së, Lee Zeldin, dhe Sekretarja e Mjedisit dhe Burimeve Natyrore të Meksikës, Alicia Bárcena, ranë dakord për një seri veprimesh që të dy qeveritë do të ndërmarrin deri në vitin 2027 për të adresuar krizën në përkeqësim të trajtimit të ujërave të ndotura.
Marrëveshja përcakton se të dyja vendet do të riangazhohen për të financuar ndërtimin dhe rinovimin e infrastrukturës për trajtimin e ujërave të ndotura në të dyja anët e kufirit. Dokumenti gjithashtu përshpejton disa projekte që pritet të përfundojnë gjatë dy viteve të ardhshme.
“Ajo që po bëjmë në të vërtetë është të përpiqemi ta zgjidhim një herë e përgjithmonë problemin e ujërave të ndotura nga lumi Tijuana,” tha Bárcena gjatë fjalimit të saj të enjten.
Zeldin ishte në një mendje me të, duke thënë se marrëveshja përfaqësonte “një fitore të madhe për miliona amerikanë dhe meksikanë.” Ai ia atribuoi suksesin interesit të veçantë të presidentit Trump për këtë çështje dhe vuri në dukje se adresimi i krizës së ndotjes së ujit do të sigurojë një mjedis më të sigurt si për banorët, ashtu edhe për stërvitjen e forcave SEAL të marinës në plazhet përreth.
Ish-Komisionerja e Komisionit Ndërkombëtar të Ujit dhe Kufirit (IBWC), Maria-Elena Giner, e quajti marrëveshjen “lajm të shkëlqyer” për të riafirmuar angazhimet e bëra më parë nga zyrtarët amerikanë dhe meksikanë në dokumentin Minute 328, i cili përcakton si do të ndahen kostot e operimit dhe mirëmbajtjes së infrastrukturës për trajtimin e ujërave në kufi.
“Nevojitet diplomaci e vazhdueshme dhe e qëndrueshme, transparencë në informacion dhe veprime konkrete të përcaktuara me Meksikën,” shtoi Giner.
Financimi i impianteve të trajtimit të ujërave të ndotura dhe operimi i tyre i vazhdueshëm ka qenë gjithmonë sfidë; kjo marrëveshje vendos pritshmëri për ndërtimin dhe rehabilitimin e projekteve që ende nuk janë financuar. Por duke qenë se partia Morena e presidentes meksikane Claudia Sheinbaum aktualisht kontrollon legjislaturën, është e mundur që fondet të ndahen në buxhetet e viteve 2026 dhe 2027.
Në konferencën e përditshme për shtyp të presidentes meksikane të premten, Bárcena theksoi se po punon për të siguruar një marrëveshje në të cilën SHBA dhe Meksika do të ndajnë përgjysmë kostot për përmirësimin e impiantit kritik të trajtimit të San Antonio de los Buenos, i vendosur në jugperëndim të Tijuana-s. Ajo vlerëson se përmirësimet për këtë projekt do të kushtojnë 67 milionë dollarë amerikanë, ose rreth 1.2 miliardë peso.
