Të dyja dhomat e Kongresit të SHBA-së kanë miratuar një prjektligj që detyron Departamentin e Drejtësisë të publikojë dosjet mbi financierin e akuzuar si pedofil, Jeffrey Epstein. Dhoma e Përfaqësuesve votoi me shumicë dërrmuese 427 vota pro dhe vetëm 1 kundër, ndërsa Senati e miratoi menjëherë me procedurë të përshpejtuar pa votim formal.
Ky zhvillim vjen pak ditë pasi presidenti Donald Trump iu përul realitetit politik, ndryshoi qëndrim, kërkoi publikimin e dokumenteve, pas reagimeve të forta të mbështetësve të tij, dhe pranoi të nënshkruante projektligjin. Skandali mbi dosjet Epstein e ka ndjekur Trump që nga kthimi i tij në Shtëpinë e Bardhë, duke e përçarë bazën e tij konservatore dhe nxitur akuza për një përpjekje “mbulimi” nga i gjithë spektri politik.
Javën e kaluar u bënë publike mbi 20,000 faqe dokumentesh të lidhura me rastin Epstein, disa prej të cilave përmendnin edhe presidentin, të cilat Shtëpia e Bardhë i mohoi si prova për ndonjë keqbërje.
Republikani Clay Higgins ishte i vetmi që votoi kundër në Dhomën e Përfaqësuesve, duke shprehur shqetësimin se publikimi mund të dëmtonte persona të pafajshëm. Ndërkohë, udhëheqja republikane në Kongres u gjet e papërgatitur pasi për javë të tëra kishte përsëritur narrativën e presidentit dhe kishte kundërshtuar publikimin. Kryetari i Dhomës, Mike Johnson, i cili më parë e ka quajtur nismën një “mashtrim demokrat”, votoi këtë herë pro.
Disa nga aleatët e presidentit amerikan që votuan pro projektligjit e bënë këtë vetëm pasi e kritikuan atë në fjalimet në sallën e parlamentit, duke argumentuar se demokratët nuk po ishin të sinqertë, por se Dhoma e Përfaqësuesve nuk mund të shpenzonte më kohë për këtë çështje.
Pasi miratimi në Dhomë ndodhi më shpejt se pritej, Senati e përshpejtoi procesin dhe miratoi masën me unanimitet. Ligji i ri kërkon që Prokurorja e Përgjithshme, Pam Bondi, të publikojë brenda 30 ditësh të gjitha materialet jo të klasifikuara që lidhen me Epstein dhe bashkëpunëtoren e tij Ghislaine Maxwell, përfshirë komunikime të brendshme, regjistra fluturimesh dhe emra personash e entitetesh të lidhur me çështjen. Megjithatë, Bondi ka të drejtë të bllokojë çdo informacion që mund të dëmtojë hetime aktive federale ose që mund të identifikojë viktima.
Epstein u gjet i vdekur në qelinë e tij në vitin 2019, ndërsa priste gjykimin për trafik seksual të të miturve. Ai njihej me Trump, por presidenti ka këmbëngulur se i shkëputi marrëdhëniet para dënimit të Epstein në vitin 2008 dhe se nuk kishte dijeni për veprimtarinë e tij kriminale. Demokratët në Komitetin e Mbikëqyrjes publikuan së fundmi disa emaile midis Epstein dhe Maxëell, disa prej të cilave përmendin Trumpin. Një prej tyre përfshin një referencë për Virginia Giuffre, një nga akuzueset kryesore të Epstein.
Rasti Epstein u rikthye në mënyrë dramatike në vëmendjen e publikut në korrik, kur Departamenti i Drejtësisë dhe FBI-ja publikuan një memo duke thënë se nuk kishin asgjë tjetër për të zbuluar në lidhje me hetimin. Kjo binte ndesh me deklaratat e bëra nga Trump dhe zyrtarët e tij të lartë që tregonin se do të publikonin më shumë informacion në lidhje me veprat penale dhe lidhjet e Epstein me elitat globale sapo të merrnin detyrën.
Epstein u deklarua fajtor për herë të parë për akuzat e nxitjes së prostitucionit me një të mitur në vitin 2008. Ai bëri 13 muaj burg dhe iu lejua të largohej për 12 orë në ditë për të punuar. Kritikët thanë se dënimi nuk përputhej me ashpërsinë e veprës penale. Pasi gazeta Miami Herald hetoi ndjekjen penale kundër Epstein, autoritetet federale rihapën çështjen kundër tij, e arrestuan dhe e akuzuan për trafikim seksual të të miturve në vitin 2019. Dy muaj më vonë, ai u gjet i vdekur në qelinë e tij të burgut në Nju Jork. Vdekja e tij u cilësua si vetëvrasje.
