Një gjyqtare nga Wisconsin u arrestua të premten nga FBI, pasi ajo akuzohet se ndihmoi një burrë që ndodhej në sallën e saj të gjyqit të shmangte autoritetet e emigracionit, në një përplasje gjithnjë e më e ashpër mes administratës së presidentit Donald Trump dhe zyrtarëve lokalë në lidhje me zbatimin e ligjit të emigracionit, raporton Reuters.
Në një padi penale, Departamenti Amerikan i Drejtësisë deklaroi se Hannah Dugan, gjyqtare në qarkun Milwaukee, refuzoi t’ia dorëzonte burrin agjentëve të emigracionit që u paraqitën për ta arrestuar në sallën e saj më 18 prill, dhe se u përpoq ta ndihmonte të shmangte arrestimin duke e lënë të dalë nga dera e jurisë.
Dugan akuzohet për pengim të një procedimi dhe fshehje të një personi për të parandaluar arrestimin. Ajo u lirua pas paraqitjes së parë në gjykatën federale dhe pritet të paraqitet sërish më 15 maj. Një turmë u mblodh përpara gjykatës, duke brohoritur “Lironi gjyqtaren tani”.
Trump ka nisur një fushatë të gjerë kundër emigracionit që kur mori detyrën në janar, dhe Departamenti i Drejtësisë i ka kërkuar prokurorëve federalë të nisin ndjekje penale kundër zyrtarëve lokalë që ndërhyjnë në këtë përpjekje. Një kundërshtim i tillë ka qenë i përhapur gjatë mandatit të tij të parë 2017-2021.
“Nuk ka askush mbi ligjin,” shkroi Prokurorja e Përgjithshme Pam Bondi në rrjetet sociale.
Administrata Trump është përfshirë në një përballje gjithnjë e më të ashpër me gjyqtarët federalë, pasi disa prej tyre kanë nxjerrë vendime që kufizojnë përdorimin agresiv të fuqisë presidenciale në çështjet e emigracionit dhe fusha të tjera. Gjykatat shtetërore kanë pasur një rol më të kufizuar në këtë debat.
Drejtori i FBI-së, Kash Patel, deklaroi në rrjetet sociale se agjentët e kishin arrestuar Dugan për ndërhyrje në përpjekjen për të arrestuar Eduardo Flores-Ruiz, të cilin e përshkroi si një “të huaj ilegal” që aktualisht ndodhet në paraburgim.
Postimi u fshi më pas, pasi ai u publikua përpara se dosja kundër Dugan të bëhej publike në gjykatën federale, gjë që mund të përbëjë një shkelje të rregullave të konfidencialitetit.
“Deklarata e drejtorit Patel tregon se FBI-ja e Trump është më e shqetësuar për armatosjen e forcave federale të rendit, ndëshkimin e njerëzve pa një proces të drejtë dhe frikësimin e kujtdo që kundërshton këto politika, sesa për kërkimin e drejtësisë,” tha David Crowley, drejtuesi i qarkut Milwaukee.
Sipas padisë, Dugan u bë “qartazi e zemëruar” dhe e quajti “absurde” kur oficerët e emigracionit arritën më 18 prill për të arrestuar Flores-Ruiz në gjykatën e saj, ku ai akuzohej për shkelje të vogla të dhunës në familje.
Avokatët e emigrantëve dhe disa zyrtarë lokalë kanë shprehur shqetësimin për arrestimet në gjykata, duke thënë se ato mund të trembin dëshmitarët që të dëshmojnë për krime.
Dugan i urdhëroi oficerët e emigracionit të flisnin me kryegjyqtarin dhe më pas i shoqëroi Flores-Ruiz dhe avokatin e tij përmes një dere që çonte në një zonë jo publike të gjykatës, thuhet në padi.
Carl Ashley, kryegjyqtari i gjykatës së Milwaukee, nuk pranoi të komentojë.
Gazeta *Milwaukee Journal-Sentinel*, duke cituar burime të paidentifikuara, tha se Dugan i kishte drejtuar Flores-Ruiz dhe avokatin e tij në një korridor privat dhe më pas në një zonë publike.
Padia thekson se Flores-Ruiz ishte dëbuar më parë në Meksikë.
Dugan u zgjodh për herë të parë gjyqtare në vitin 2016 dhe më parë ishte drejtore e degës lokale të *Catholic Charities*, e cila ofron, ndër të tjera, programe për zhvendosjen e refugjatëve. Ajo kaloi pjesën më të madhe të karrierës së saj të hershme si avokate në *Legal Aid Society of Milwaukee*, e cila ndihmon personat në nevojë.
Në SHBA, gjyqtarët rrallë përballen me akuza penale gjatë mandatit të tyre. Akuzat për sjellje të pahijshme zakonisht hetohen nga agjencitë shtetërore të mbikëqyrjes dhe 9 nga 10 ruajnë postet e tyre, sipas një analize të *Reuters* mbi më shumë se 1500 raste të tilla.
Gjatë mandatit të parë të Trump, prokurorët federalë ngritën akuza penale ndaj një gjyqtari në Massachusetts që akuzohej se pengoi arrestimin e një të pandehuri në sallën e gjyqit nga autoritetet federale të emigracionit. Ato akuza u tërhoqën në vitin 2022, pasi Trump nuk ishte më në detyrë.
Barbara McQuade, ish-prokurore federale dhe tani pedagoge në Fakultetin Juridik të Universitetit të Michiganit, tha se gjyqtarët nuk kanë imunitet të veçantë, por prokurorët duhet të marrin në konsideratë ndikimin mbi sistemin federal të SHBA, i cili u lejon shteteve të zbatojnë ligjet e tyre.
“Kjo duket si një shfrytëzim shumë agresiv i diskrecionit të prokurorëve,” tha ajo.
—
