Një plan pasluftës për Gazën, i hartuar nga amerikanët, do të parashikonte administrimin nga Shtetet e Bashkuara të enklavës së shkatërruar nga lufta për të paktën një dekadë, zhvendosjen e popullsisë palestineze dhe rindërtimin e saj si një destinacion turistik dhe qendër prodhimi, raportoi të dielën Washington Post.
Sipas gazetës, që ka parë një dokument prej 38 faqesh, rreth 2 milionë banorë të Rripit të Gazës do të largoheshin, të paktën përkohësisht, nga territori – qoftë përmes largimeve “vullnetare” drejt një vendi tjetër, qoftë përmes zhvendosjes në zona të kufizuara brenda territorit gjatë periudhës së rindërtimit, shkruan News.ro.
Më herët, Reuters raportoi se ekziston një propozim për ndërtimin e kampeve të mëdha, të quajtura “Zona të tranzitit humanitar”, brenda dhe ndoshta jashtë Gazës, për të strehuar popullsinë palestineze.
Plani mbante emrin Fondacioni Humanitar i Gazës (GHF), një grup i diskutueshëm i ndihmave humanitare, i mbështetur nga SHBA.
Çdokujt që zotëron tokë do t’i jepet një “token digjital” në këmbim të të drejtave për riorganizimin e pronës së tij, sipas Washington Post. Gjithashtu, çdo palestinez që largohet do të marrë 5.000 dollarë në dorë dhe subvencione për të mbuluar qiranë për një periudhë prej katër vitesh. Për më tepër, atyre do t’u sigurohet ushqim për një vit, shton gazeta.
Plani “GREAT Trust”
Sipas The Post, plani quhet “Gaza Reconstitution, Economic Acceleration and Transformation Trust”, ose shkurt GREAT Trust, dhe është përgatitur nga GHF, i cili bashkëpunon me ushtrinë izraelite dhe përdor kompani private amerikane të sigurisë dhe logjistikës për të transportuar ndihma ushqimore në Gaza.
Plani mbështetet nga administrata Trump dhe nga Izraeli si një alternativë ndaj sistemit të udhëhequr nga OKB-ja, për të cilin Izraeli thotë se lejon militantët të devijojnë ndihmat.
Në fillim të gushtit, OKB deklaroi se mbi 1.000 persona ishin vrarë gjatë përpjekjes për të marrë ndihma në Gaza, që kur GHF filloi të funksionojë në maj 2025 – shumica e tyre të qëlluar nga forcat izraelite pranë qendrave të shpërndarjes së GHF.
Më 4 shkurt, Trump deklaroi për herë të parë publikisht se SHBA duhet të “marrin kontrollin” e enklavës së shkatërruar nga lufta dhe ta rindërtojnë atë si “Riviera e Lindjes së Mesme”, pas zhvendosjes së popullsisë palestineze diku tjetër.
Këto komente shkaktuan zemërim mes shumë palestinezëve dhe organizatave humanitare për mundësinë e zhvendosjes së detyruar nga Gaza.
Një e katërta e popullsisë së Gazës përballet me uri
Forcat izraelite bombarduan gjatë natës periferitë e qytetit Gaza nga ajri dhe toka, duke shkatërruar shtëpi dhe duke dëbuar edhe më shumë familje, ndërsa kabineti i sigurisë i kryeministrit Benjamin Netanyahu u mblodh të dielën për të diskutuar një plan për të marrë kontrollin e qytetit.
Ushtria izraelite ka intensifikuar gradualisht operacionet në zonën e qytetit Gaza gjatë tre javëve të fundit. Të premten, ajo i dha fund pauzave të përkohshme në zonë, të cilat lejonin shpërndarjen e ndihmave, duke e shpallur atë si “zonë të rrezikshme lufte”.
Të dielën, drejtuesja e Programit Botëror të Ushqimit, Cindy McCain, deklaroi se kjo vendim i Izraelit do të kufizojë aksesin në ushqime dhe do të vërë në rrezik punonjësit humanitarë.
“Ky vendim do të kufizojë sasinë e ushqimit që njerëzit mund të marrin,” tha McCain në programin “Face the Nation” të CBS News.
Një raport i publikuar në fillim të këtij muaji nga monitori global i urisë Integrated Food Security Phase Classification (IPC) tregoi se rreth 514.000 persona – pothuajse një e katërta e popullsisë së Gazës – përballen me kushte urie në qytetin Gaza dhe zonat përreth.
Izraeli i ka hedhur poshtë përfundimet e IPC si të rreme dhe të njëanshme, duke thënë se anketimi bazohej në të dhëna të pjesshme, kryesisht të ofruara nga Hamasi, dhe se nuk mori parasysh fluksin e fundit të ushqimeve.
