Nuk ka fund skandali i basteve sportive që ka tronditur futbollin turk. Hetimet e nisura që në vjeshtë kanë sjellë një valë të re ndëshkimesh ndaj lojtarëve dhe arbitrave, duke përfshirë edhe emra të njohur të kampionatit.
Federata Turke e Futbollit ka bërë të ditur se Komisioni i saj Disiplinor ka pezulluar gjithsej 224 futbollistë dhe 24 arbitra, pas verifikimeve të lidhura me përfshirjen në baste sportive të paligjshme. Rreth një muaj më parë, mbi një mijë lojtarë ishin referuar në organet e drejtësisë, së bashku me arbitra dhe zyrtarë klubesh.
Mes emrave të përfshirë në hetime ishte edhe Eren Elmali i Galatasaray, i cili u përjashtua përkohësisht edhe nga kombëtarja turke. Veç Disiplinës sportive, mbi të akuzuarit rëndojnë edhe akuza penale pasi shumë zyrtarë dhe futbollistë të njohur janë arrestuar. Mes të arrestuarve janë lojtarë nga klubet kryesore të Turqisë, kapiteni Mert Hakan Yandas i Fenerbahçes dhe Metehan Baltaci i Galatasaray.
Sipas të dhënave zyrtare, 197 nga 224 futbollistët e pezulluar janë amatorë, ndërsa pesë nga 24 arbitrat e ndëshkuar gjykojnë në kategorinë e parë të futbollit turk. Masat disiplinore variojnë nga 45 ditë deri në një vit pezullim nga aktivitetet sportive.
Federata turke ka sqaruar se çdo rast është trajtuar individualisht dhe në përputhje me rregulloren disiplinore në fuqi. Hetimet për këtë çështje vijojnë dhe pritet të zgjasin edhe në periudhën në vazhdim.
Skandali konsiderohet si një nga më të mëdhenjtë në historinë e futbollit turk, ndërsa autoritetet kanë paralajmëruar tolerancë zero ndaj çdo forme të manipulimit të garave sportive.
