Play-off-et e Champions League përfaqësojnë pikën ku iluzionet marrin fund dhe mbetet vetëm realiteti i futbollit europian. Për skuadrat italiane, kjo fazë është testi i vërtetë i pjekurisë, karakterit dhe ambicies. Interi, Juventusi dhe Atalanta hyjnë në këtë filtër të pamëshirshëm me objektiva të ndryshme, por me të njëjtin detyrim: të provojnë se i përkasin elitës kontinentale.champions
INTERI Interi i afrohet play-offeve të Champions League me statusin e favoritit, veçanërisht në ndeshjet në shtëpi. Zikaltërit kanë ndërtuar një skuadër të ekuilibruar, të disiplinuar dhe me eksperiencë europiane. Loja e tyre bazohet te organizimi, kontrolli i hapësirave dhe menaxhimi i momenteve kyçe të ndeshjes. Megjithatë, Europa nuk gjykohet mbi letër. Shorti mund t’i rezervojë Interit një kundërshtar shumë të rrezikshëm, dhe skenari më i ndërlikuar do të ishte një përballje me Benfikën e drejtuar nga ishi Zhoze Murinjo. Trajneri portugez di si të ndërtojë ndeshje nervore dhe taktike, ku çdo gabim i vogël shndërrohet në ndëshkim maksimal. Interi duhet të shmangë kurthin emocional që shoqëron duele të tilla. Forca e vërtetë e skuadrës së Kivut qëndron te qetësia dhe disiplina taktike. Çdo luhatje mendore apo taktike mund të kushtojë shtrenjtë në një kompeticion ku gabimet nuk falen. Edhe në rast kualifikimi, rruga nuk bëhet më e lehtë. Mançester Siti përfaqëson një mur pothuajse të pakalueshëm. Të besuarit e Pep Guardiolës janë skuadra më e kompletuar e kontinentit, me cilësi në çdo repart. Përballë tyre, Interi do të ishte i detyruar të luante me pragmatizëm absolut dhe durim ekstrem. Champions League kërkon shumë më tepër se formë të mirë. Më e lehtë në letër do të ishte përballja me kampionët portugezë të Sporting Lisbonës.
JUVENTUSI Juventusi mbërrin në këtë fazë me besim të rifituar. Rritja e fundit në rezultate dhe lojë ka rikthyer një ndjenjë stabiliteti në ambientin bardhezi. Megjithatë, Europa mbetet një terren krejtësisht i ndryshëm nga kampionati vendas. Në ndeshjet direkte të Champions League, çdo detaj merr peshë vendimtare. Një nga rreziqet kryesore për Juven mban emrin Viktor Osimhen. Sulmuesi nigerian është një makth për çdo mbrojtje falë forcës fizike, shpejtësisë dhe instinktit për gol. Juventusi duhet të kontrollojë ndeshjen nga mesi i fushës, duke diktuar ritmin dhe duke shmangur tranzicionet e shpejta kundërshtare. Presioni i ambienteve të nxehta europiane mund të ndikojë ndjeshëm në rezultat, por këtu del në pah përvoja historike e klubit. Bardhezinjtë dinë si të mbijetojnë në ndeshje të vështira. Megjithatë, pas play-off-it pengesat rriten ndjeshëm. Liverpul dhe Totenham përfaqësojnë futbollin anglez me ritëm ekstrem dhe intensitet konstant. Në këtë nivel, çdo moment hezitimi ndëshkohet menjëherë. Champions League është prova përfundimtare e rikthimit të Juven në elitë.
ATALANTA Atalanta hyn në play-off me më shumë dyshime sesa siguri. Rezultatet e fundit kanë lënë gjurmë, duke vënë në pikëpyetje stabilitetin e skuadrës së Paladinos. Identiteti i Atalantës mbetet intensiteti i lartë dhe presioni konstant, por Europa kërkon edhe kontroll emocional. Një përballje me Borusia Dortmund do të ishte jashtëzakonisht e ashpër. Gjermanët kanë eksperiencë, forcë fizike dhe ritëm të lartë. Për Atalantën, çdo gabim minimal mund të jetë fatal. Skuadra duhet të luajë në mënyrë perfekte për të mbijetuar. Edhe kalimi i këtij raundi nuk sjell lehtësim. Në 1/8-at e finales, niveli rritet ndjeshëm. Bajern Mynih mbetet një emër që tremb këdo, ndërsa Arsenali po rikthehet fuqishëm në elitën europiane. Diferencat teknike dhe taktike dalin shpejt në pah në këtë fazë. Play-off-et janë filtri më i ashpër i Europës. Interi kërkon konfirmim në nivelin më të lartë. Juventusi synon rikthimin mes elitës. Atalanta lufton për të ruajtur ëndrrën europiane. Asgjë nuk fitohet pa vuajtje në këtë fazë. Çdo ndeshje është një provë karakteri. Presioni është pjesë e lojës së madhe. Champions League nuk fal dobësi. Ajo shpërblen vetëm guximin, inteligjencën dhe forcën mendore.
PLAY-OFF
Borusia Dortmund ose Olimpiakos kundër Atalanta ose Bajer Leverkusen (fitueset do ndeshen me Arsenalin dhe Bajern Mynihun)
Bodo/Glimt ose Benfika kundër Real Madrid ose Inter (fitueset do ndeshen me Sportingun dhe Mançester Sitin)
Monako ose Karabak kundër PSG ose Njukasëll (fitueset do ndeshen me Barcelonën dhe Çelsin)
Klub Bryzh ose Gallatasaraj kundër Juventus ose Atletiko Madrid (fitueset do ndeshen me Liverpulin dhe Totenhemin)
