Një tragjedi e rëndë ka ndodhur në Algjeri pas përfundimit të ndeshjes së kampionatit mes MC Alger dhe NC Magra, ku Mouloudia Club d’Alger siguroi matematikisht titullin kampion të vendit. Festimet u kthyen në tragjedi, pasi një pjesë e gardhit mbrojtës në një nga tribunat u thye duke shkaktuar vdekjen e tre tifozëve dhe plagosjen e 81 të tjerëve. Tifozët u rrëzuan nga kati i dytë në atë të parë nga një lartësi e konsiderueshme.
Sipas autoriteteve algjeriane, fillimisht u raportua për një viktimë, por dy tifozë të tjerë humbën jetën më vonë për shkak të plagëve të rënda. Incidenti ndodhi menjëherë pas përfundimit të ndeshjes, e cila përfundoi me rezultat të barabartë 0-0, rezultat që i mjaftoi MC Alger për të konfirmuar titullin e shumëpritur.
Mediat vendase, përfshirë La Gazette du Fennec, raportojnë se tragjedia ndodhi kur një barrierë sigurie nuk përballoi presionin e turmës së entuziazmuar që po përgatitej të festonte në mënyrë spontane me ekipin.
Federata Algjeriane e Futbollit dhe klubi MC Alger kanë shprehur ngushëllimet e tyre për familjet e viktimave, ndërsa është hapur një hetim për të zbardhur shkaqet e sakta të ngjarjes dhe për të përcaktuar përgjegjësitë.
