Shqipëria përmbush standardet përsa i takon transparencës fiskale. Në raportin për vitin 2025, të publikuar nga Departamenti Amerikan i Shtetit, Shqipëria hyn në grupin e 71 vendeve, ku qeveritë u vlerësuan për përmbushje të kërkesave minimale të transparencës fiskale.
Në vlerësimin e tij, Departamenti i Shtetit thekson se Shqipëria, së bashku me disa vende të tjera, ka siguruar transparencë në dokumentet buxhetore, kontratat dhe licencat publike, duke përmbushur standardet në lidhje me publikimin, përmbajtjen dhe besueshmërinë e tyre.
Në listën e shteteve që përmbushin kërkesat minimale të transparencës fiskale përfshihen edhe disa vende të rajonit si Kroacia, Kosova apo Maqedonia e Veriut.
Raporti i DASH për transparencën fiskale përfshinë 140 qeveri dhe entitete nga e gjithë bota. Nga këto 71 u cilësuan si përmbushëse të kërkesave minimale, ndërsa 69 nuk arritën të plotësonin kriteret, megjithëse vlerëson se 26 prej tyre kanë bërë përparim të konsiderueshëm drejt rritjes së transparencës.
Një përcaktim i përmbushjes së kërkesave tregon se një qeveri i ka përmbushur në mënyrë të kënaqshme të gjitha kërkesat minimale të transparencës fiskale.
‘Departamenti arriti në përfundimin se, nga 139 vendet (dhe Autoriteti Palestinez) të vlerësuara, 71 qeveri përmbushën kërkesat minimale të transparencës fiskale dhe 69 nuk i përmbushën kërkesat minimale. Megjithatë, nga këto 69, 26 bënë përparim të konsiderueshëm drejt përmbushjes së kërkesave minimale të transparencës fiskale.
Departamenti vlerësoi qeveritë e mëposhtme si qeveri që përmbushin kërkesat minimale të transparencës fiskale për vitin 2025: Shqipëria, Argjentina, Armenia, Bahamas, Benini, Bosnja dhe Hercegovina, Botsvana, Brazili, Bullgaria, Burkina Faso, Kepi i Gjelbër, Kili, Kolumbia, Komoret, Kosta Rika, Bregu i Fildishtë, Kroacia, Çekia, Estonia, Fixhi, Gjeorgjia, Gana, Greqia, Guatemala, Guajana, Hondurasi, Hungaria, India, Indonezia, Izraeli, Xhamajka, Jordania, Kazakistani, Kenia, Kosova, Republika e Kirgistanit, Letonia, Lituania, Malajzia, Malta, Mauritiusi, Meksika, Mikronezia (Shtetet e Federuara), Moldavia, Mali i Zi, Maroku, Namibia, Nepali, Maqedonia e Veriut, Panamaja, Paraguai, Peruja, Filipinet, Polonia, Portugalia, Rumania, Ruanda, Serbia, Sejshelet, Singapori, Sllovakia, Sllovenia, Afrika e Jugut, Sri Lanka, Tailanda, Timori Lindor, Trinidad dhe Tobago, Tunizia, Turqia, Uganda dhe Uruguai.
Departamenti vlerësoi se sa vijon nuk i përmbushin kërkesat minimale të transparencës fiskale për vitin 2025, dhe tabela më poshtë identifikon nëse secila prej tyre ka bërë përparim të rëndësishëm drejt përmbushjes së këtyre kërkesave’, thuhet në raport.
Ky raport nënvizon se transparenca fiskale është një komponent thelbësor i menaxhimit të përgjegjshëm të financave publike, pasi rrit besimin e tregjeve dhe forcon llogaridhënien e qeverive ndaj qytetarëve të tyre.
Kliko këtu për të lexuar raportin e DASH për transparencën fiskale
