Kombëtarja e Uruguait po përballet me një fillim kaotik të fushatës së saj në Kupën e Botës 2026, pasi ka mbetur e bllokuar në Meksikë para ndeshjes së parë.
Ekipi i drejtuar nga Marcelo Bielsa ka udhëtuar në Cancun për përgatitjet e fundit para debutimit në Kupën e Botës kundër Arabisë Saudite, mesnatën mes të hënën dhe të martën (00:00). Megjithatë, skuadra është detyruar të presë pasi avioni i planifikuar nuk kishte autorizimin e nevojshëm për të fluturuar drejt Shteteve të Bashkuara të Amerikës.
Sipas raportimeve, problemi lidhet me dokumentacionin e avionit, i cili nuk është miratuar për itinerarin nga Cancuni drejt Miamit.
Tragjike në SHBA, aeroplani rrëzohet menjëherë pas nisjes, humbin jetën 11 parashutistët dhe piloti
LEXO EDHE:
Tragjike në SHBA, aeroplani rrëzohet menjëherë pas nisjes, humbin jetën 11 parashutistët dhe piloti
Skuadra uruguaiane vazhdon të qëndrojë në Mayakoba Complex, një resort rreth 45 minuta larg aeroportit ndërkombëtar të Cancunit, ndërsa pret informacione mbi planet e reja të udhëtimit.
Ekziston një urgjencë për zgjidhjen e situatës, pasi Bielsa është planifikuar të marrë pjesë në një konferencë për shtyp para ndeshjes në stadiumin e Miamit. Megjithatë, duket gjithnjë e më e mundshme që trajneri uruguaian të mos arrijë të marrë pjesë në këtë takim me mediat.
Vështirësitë e Uruguait janë vetëm një nga disa problemet e udhëtimit që ekipet dhe individët kanë hasur gjatë rrugës drejt SHBA-së për turneun.
Arbitrit somalez Omar Artan iu refuzua hyrja në vend për shkak të shqetësimeve të papërcaktuara gjatë procesit të verifikimit, pavarësisht se ndodhej në listën e punonjësve të miratuar nga FIFA. Ndërkohë, kreu i futbollit palestinez Jibril Rajoub deklaroi të premten se ende po pret lejen për të hyrë në SHBA.
Nga ana tjetër, Irani pretendon se kuota e biletave për tifozët e tij është anuluar vetëm një javë para ndeshjes së parë kundër Zelandës së Re në Los Angeles. Federata Iraniane e Futbollit deklaroi se ky vendim do të “sabotojë praninë e tifozëve iranianë”.
Në një rast tjetër, futbollistit ganez Thomas Partey iu refuzua hyrja në Kanada për shkak të akuzave të mëparshme të ngritura ndaj tij nga policia metropolitane e Londrës. FIFA konfirmoi në një deklaratë se lojtari nuk do të mund të udhëtojë nga kampi stërvitor i Ganës drejt Kanadasë për ndeshjen e parë kundër Panamasë, pasi aplikimi i tij për vizë ishte refuzuar nga qeveria kanadeze.
Uruguai do t’i luajë dy ndeshjet e para të fazës së grupeve në Miami, kundër Arabisë Saudite më 15 qershor dhe kundër Kepit të Gjelbër më 21 qershor. Më pas skuadra do të kthehet në Meksikë për ndeshjen e fundit të grupit kundër Spanjës më 27 qershor.
