Vritet në sallën e gjyqit gjyqtari i Apelit të Tiranës, Astrit Kalaja! Plumbat kapin edhe babë e bir! Arrestohet autori, xhaxhai i tij humbi gjyqin për pronën

Njëri prej tyre tha se disa kohë më parë, Gjon Shkambi, xhaxhai i vrasësit të gjyqtarit, Elvis Shkambi, ju kishte shkuar me armë dhe policia nuk e arrestoi apo të merrte ndonjë masë tjetër.

Për situatën e krijuar, ky banor për fajtor ish-kryebashkiakun e Shkodrës, Lorenc Luka, për të cilin thotë se kishte lëshuar dokument privatizimi për objektin pa vendim të këshillit bashkiak.

“Ngushëllime familjes, na ka ardhur shumë keq. Këto punë i ka bërë Lorenc Luka se i ka lëshuar vërtetim që jemi dakord të privatizohet pa vendim të këshillit të bashkisë. E ka vrarë Lorenc Luka, nuk e ka vrarë shteti, as Shkambi, e ka vrarë Lorenc Luka. Kemi bërë një gjyq, e kemi fituar, e ka kthyer Gjykata e Apelit. Ka ardhur Apeli i Vlorës e kanë gjykuar në Shkodër, jo Apeli i Shkodrës, edhe ja kanë kthyer detyrat për falsifikim dokumentesh se nuk kishte pronë dhe nuk kishte vendimin e Këshillit të Bashkisë. Kur zhvillohej gjyqi në Shkallë të Parë, e pa se po humbiste gjyqin edhe pushoi çështjen. Tani Gjon Shkambi ka ardhur vjet këtu i armatosur, ka ardhur policia, i kemi thënë e ka armën në makinë, edhe nuk e ka ‘çarë kokën’ policia të shkojë të arrestojë. Fajin e ka shteti. Nuk kanë kurrëfarë prone se e kemi marrë tokën nga Agjencia Kombëtare e Kthimit dhe Kompensimit të Pronave në Tiranë, që Gjon Shkambi nuk ka pronë në Shkodër. Edhe është në vendim të gjykatës atje. I kanë humbur të gjitha gjyqet se nuk kanë dokumente, vetëm kanë bërë falsifikime e manipulime. Se po të kishte dokument, do ta gëzonte”.

Edhe një qytetar tjetër, banor në këtë godinë, shprehet Bashkia e Shkodrës ia kishte shitur objektin Gjon Shkambit, pasi i kishte strehuar 31 familjet. Ai bën fajtor shtetin për situatën e krijuar, teksa thekson se prej 33 vitesh janë në proces gjyqësore.

“Edhe kemi qëndruar, ka ardhur Gjon Shkambi në 2012: është ndërtesa ime, është shtëpia ime. Na ka futur nëpër gjyqe. Kemi investuar sa kemi mundur në të, kemi harxhuar para. Tani e prej kohësh na ka bërë presion është shtëpia ime, duan shtëpinë. Kemi qëndruar në tension prej 33 vitesh, fajin na e ka shteti. Bashkia që na e ka dhënë neve ka shkuar dhe ia ka shitur dhe atij. Asnjë nuk na e ka fajin vetëm bashkia. Neve na ka strehuar në të atij pastaj ia ka shitur. Të gjitha fajet i ka shteti, më zi nuk ka ku të shkojë, se për gjithë këto shtëpia nuk është dashur të vritet gjyqtari. Më parë kishim dalë në rrugë të madhe se sa të vrasësh gjyqtarin. Më mirë të na vriste ne sesa të vriste gjyqtarin pa faj. Shteti na e ka dhënë neve, shteti ia ka dhënë atij, të gjitha fajet i ka shteti”.

Kryetar i Bashkië në Shkodër në vitin 2012 kur u firmos kontrata e shitjes se godinës, ishte Lorenc Luka.

Në vendimin e sotëm të Apelit, Elvis Shkambi vrau me armë gjyqtarin Astrit Kalaja, duke e qëlluar me 3 plumba, ndërsa plagosi edhe dy persona të tjerë, babë e bir, të cilët janë pala tjetër e procesit, si një nga 31 familjet.

Në këtë godinë strehohen 31 familje. Ndërsa familja Shkambi pretendon pronësinë e të gjithë godinës.

Në vitin 1992, 31 familjet familje me vendim të Bashkisë së Shkodrës u vendosën në godinën e ish-Shkollës së Rezervave të ndërtimit. Banorët pretendojnë se prona është ende shtetërore dhe se dokumentet e Gjon Shkambit janë të falsifikuara.

Ndërsa familja Shkambi kërkon të nxirren jashtë 31 familjet.

Në gjyqin e sotëm, Apeli i Juridiksionit të Përgjithshëm dha vendim jo në favor të autorit dhe familjes së tij.

Në këtë moment, Elvis Shkambi 30 vjeç qëlloi me armë në drejtim të gjyqtarit Kalaja duke e lënë të vrarë.

Me 3 plumba u qëllua gjyqtari, 2 në kraharor dhe 1 në bark.

Astrit Kalaja ndërroi jetë rrugës për në Spitalin e Traumës, ku dhe u konstatua vdekja e tij.

Autori Elvis Shkambi ka qenë brenda në sallë në seancën gjyqësore që ka nisur rreth orës 14:00, ku vetë ai ishte palë në një gjyq për çështje pronash.

Gjyqtari ka dhënë vendim në favor të të plagosurve, dhe jo të tij. Pas përfundimit të vendimit gjyqtari është qëlluar nga autori. Ky i fundit menjëherë armën ia ka dhënë rojës së sigurisë së gjykatës. Pas kësaj ai ka dalë te dera e gjykatës ku i ka thënë patrullës së policisë që unë jam autori.

“Rreth orës 15:40, në ambientet e Gjykas sekuestrohet arma e krimittës së Apelit të Juridiksionit të Përgjithshëm Tiranë, gjatë një procesi gjyqësor, dyshohet se shtetasi E. Sh., 30 vjeç (palë në proces) ka qëlluar me armë zjarri drejt gjyqtarit, shtetasit A. K., dhe shtetasve R. K., 65 vjeç dhe E. K., 45 vjeç, atë e bir (pala tjetër në proces).

Si pasojë ka humbur jetën shtetasi A. K. dhe janë plagosur shtetasit R. K. dhe E. K, të cilët janë jashtë rrezikut për jetën.

Shërbimet e Policisë me marrjen e njoftimit kanë shkuar menjëherë në vendngjarje dhe kanë bërë të mundur kapjen dhe shoqërimin në ambientet e DVP Tiranë, të autorit të dyshuar, shtetasin E. Sh., si dhe kanë sekuestruar armën e krimit.

Në vijim do të jepet informacion më i plotë për ngjarjen”, njoftoi sot policia.

Në këtë ndërtesë, ish-shkolla e rezervave të ndërtimit, jetojnë 31 familje, por prej vitesh, pronësinë e saj e ka pretenduar Gjon Shkambi, xhaxhai i vrasësit të gjyqtarit në sallën e gjyqit.

Banorët që jetojnë në atë ndërtesë dhe janë në konflikt disa vjeçar me Gjon Shkambin, për plumbat ndaj gjyqtarit dhe anëtarët palë në proces vënë gishtin e fajit tek shteti.

Si vrasës të gjyqtarit ata akuzojnë ish-kryebashkiakun e Shkodrës, demokratin Lorenc Luka, i cili në vitin 2012 firmosi kontratë shitje të pronës me Gjon Shkambin pa vendim të këshillit bashkiak dhe shtetit që autorizoi banorët të privatizojnë godinat e shtetit.

Familjet janë strehuar aty prej vitit 1992, derisa në 2012-ën, Gjon Shkambi që pretendonte të jetë trashëgimtar i truallit ku ishte ndërtuar objekti shtetëror, ushtroi të drejtën e parablerjes nga Ministria e Financave dhe Bashkia e Shkodrës. Në këtë vit, ai u pajis me certifikatë pronësie.

Banorët i quajti zaptues, ndërsa familjet e strehuara aty nga ana tjetër, e akuzonin Shkambin se i kishte falsifikuar dokumentet. Mes këtyre përplasjeve pa ndarë dot se kujt i përket prona, nisi një kalvar i gjatë në dyert e gjykatave.

Në 2015-ën Gjon Shkambi u njoh pronar nga Gjykata e Shkallës së Parë në Shkodër e cila shpalli të falsifikuara dokumentet e paraqitura nga familjet e tjera. Përmbarimi privat nuk mundi ta ekzekutojë vendimin pasi familjet refuzuan të lënë godinën, duke ngritur kundërpadi. Akuzat, Shkambi i ka pasur edhe ndaj policisë, se për shkak të lidhjes me familjet sipas tij, nuk ka mbështetur me forca përmbarimin për të ekzekutuar vendimin.

Duke besuar se janë ata pronarët, familjet e tjera e çuan çështjen në Apel, e cila në 2018-ën, e riktheu sërish në shkallë të parë me argumentin se mungonte akt ekspertimi që kishte njohur pronar Gjon Shkambin.

Që atëherë, çështja është zvarritur në dyert e institucioneve dhe të drejtësisë, me disa procese gjyqësore paralelisht në shkallë të ndryshme të gjyqësorit.

Edhe seanca e 6 tetorit me palë familjet që jetojnë në godinë, përfshirë Ragip Kurtaj i cili mbeti i plagosur në gjyq me të birin, dhe Gjon Shkambin, si palë e interesuar, ishte një nga proceset që janë ende të hapura. Këtë herë për gjoba që përmbaruesit kishin vënë ndaj familjeve që vijojnë të banojnë, në godinën e pretenduar nga familja Shkambi.

Ajo që dihet deri më tani është fakti që Gjykata e Apelit të Juridiksionit të Përgjithshëm ruhet nga polici private.

Siç bëhet me dije nga burimet për Shqiptarja.com, dyshohet se nuk kanë funksionuar detektorët metalikë, duke mos kapur armën, që tashmë është sekuestruar nga policia. Edhe autori është arrestuar.