Rezultatet e para nga zgjedhjet në Hungari tregojnë një epërsi të fortë të opozitës. Me 37% të votave të numëruara, partia kryesore opozitare Tisza ka marrë 51.22% të votave. Ndërkohë, kryeministri Viktor Orbán dhe partia e tij Fidesz ndodhen shumë prapa, me vetëm 40.11%.
Zgjedhësit votuan për të rinovuar Parlamentin me 199 anëtarë. Partia Tisza aktualisht parashikohet të marrë 132 mandate – pak më pak se 133 që nevojiten për shumicën prej dy të tretash – kundrejt 59 mandateve të Fidesz dhe 8 të Mi Hazank.
Hungaria shënoi pjesëmarrje historike në zgjedhjet parlamentare të këtij viti. Nga mediat hungareze rezulton se të paktën deri në orën 18:30, drejt kutive të votimit u drejtuan 77.8% e shtetasve me të drejtë vote. E përkthyer në shifra konkrete, pjesëmarrja regjistron rreth 5.8 milionë votues, duke arritur një nivel historik. Zgjedhësit votuan për të rinovuar Parlamentin me 199 anëtarë.
Gulyás, shefi i kabinetit të kryeministrit hungarez Orbán, deklaron se pjesëmarrja e lartë në votime është rezultat i mobilizimit të Fidesz. Nga ana tjetër, lideri i opozitës hungareze, Péter Magyar, thotë : «Regjimi po jeton orët e tij të fundit, jemi në prag të një ndryshimi sistemi. Le ta kalojmë së bashku! Të qëndrojmë të gjithë të qetë dhe me humor të mirë: koha është në anën tonë! Zoti e bekoftë Hungarinë!»
Zyrtarisht, votimi që u hap në orën 06:00 të kësaj të diele, duhej të kishte përfunduar në orën 19:00, por për shkak të radhëve të gjata me votues që presin të ushtrojnë të drejtën e tyre demokratike, procesi vijon ende në disa qendra votimi të Hungarisë..
Afro 7.5 milionë hungarezë dhe 500 mijë të tjerë që jetojnë jashtë vendit, u thirrën të marrin pjesë në zgjedhjet parlamentare që mund t’i japin fund mbretërimit 16-vjeçar të kryeministrit Viktor Orban në pushtet dhe të shënojnë një pikë kthese politike, me efekte në Evropë dhe në marrëdhëniet me Rusinë dhe Shtetet e Bashkuara.
Udhëheqësi nacionalist euroskeptik Orban, 62 vjeç, ka udhëhequr vendin që nga viti 2010 dhe ka ndërtuar një model të “demokracisë joliberale” – sipas përkufizimit të tij – që është parë me interes nga qarqet konservatore perëndimore, përfshirë ato pranë Donald Trump.
Pasi hodhi votën pak pas orës 08:00 të mëngjesit, Orbán u ndal për të folur me gazetarët. I pyetur për pjesëmarrjen e lartë, ai u shpreh se “është një gjë shumë e mirë; sa më shumë të jemi, aq më mirë”. Në lidhje me rivalin e tij, ai shtoi se “nuk nënvlerësojmë askënd”, ndërsa për një mesazh për kundërshtarin deklaroi shkurt: “Mesazhin tim ua kam dhënë tashmë votuesve”. I pyetur gjithashtu për marrëdhëniet me Rusinë dhe nëse e konsideron veten mik të Vladimir Putinit, ai u përgjigj se “Hungaria përpiqet të mbajë marrëdhënie miqësore me liderët e të gjitha vendeve të mëdha dhe, fatmirësisht, ka shumë miq në botë”.
Në vitet e fundit, ai është dashur të përballet me pakënaqësi të brendshme në rritje për shkak të stagnimit ekonomik, rritjes së kostove të jetesës dhe akuzave për korrupsion të lidhura me oligarkët pranë qeverisë.
Përballë tij, sfidanti Péter Magyar, 45 vjeç, një ish-aleat i Orban dhe tani udhëheqës i partisë së qendrës së djathtë Tisza, i cili ka përfituar nga pakënaqësia publike, veçanërisht midis të rinjve dhe votuesve urbanë.
Magyar hodhi votën në Budapest rreth orës 08:30 dhe më pas zhvilloi një deklaratë të shkurtër për mediat, ku parashikoi një pjesëmarrje rekord dhe theksoi se në disa qendra votimi “edhe një apo dy vota mund të bëjnë diferencën”. Ai deklaroi se partia e tij kishte marrë dhjetëra raportime për parregullsi të mundshme zgjedhore dhe u bëri thirrje autoriteteve të veprojnë “me gjithë forcën e ligjit” nëse konstatojnë shkelje. “Askush nuk duhet të përfundojë në burg në vend të mafies së Fidesz,” tha ai. Në të njëjtën kohë, ai u shpreh i bindur për rezultatin: “Askush nuk mund ta besojë seriozisht që Tisza — dhe Hungaria — nuk do t’i fitojë këto zgjedhje”, duke shtuar se rezultati do të pranohet vetëm nëse nuk ka manipulime që ndikojnë ndjeshëm në votim.
Çfarë thonë sondazhet?
Sondazhet gjatë dy javëve të fundit tregojnë se Tisza ka një epërsi midis 38% dhe 41%. Partia Fidesz, e udhëhequr nga kryeministri aktual hungarez, thuhet se është prapa me 7-9 pikë përqindjeje. Por rezultatet ndryshojnë, duke lënë disa skenarë të hapur, përfshirë një garë të mundshme kokë më kokë.
Votimi po ndiqet nga afër në Bruksel, ku disa vende të Bashkimit Evropian e akuzojnë Orbanin për dobësimin e sundimit të ligjit, shtypjen e lirisë së medias dhe minimin e të drejtave të pakicave.
Një humbje e tij mund të zhbllokojë një paketë ndihme të BE-së me vlerë afërsisht 90 miliardë euro për Ukrainën dhe të zvogëlojë ndikimin rus brenda Unionit, duke pasur parasysh marrëdhënien e ngushtë të Orbanit me Presidentin rus Vladimir Putin.
Gjatë fushatës zgjedhore, kryeministri hungarez e portretizoi votimin si një zgjedhje midis “luftës dhe paqes”, duke argumentuar se një fitore e opozitës do ta tërhiqte Hungarinë në konfliktin në Ukrainë, një akuzë e mohuar fuqimisht nga hungarezët. Udhëheqësi i opozitës është përqendruar në një axhendë kundër korrupsionit dhe rimëkëmbje ekonomike.
Rezultati i votimit mund të ripërcaktojë jo vetëm ekuilibrin e brendshëm të pushtetit të vendit, por edhe ekuilibrin politik në Evropë.
Numërohen mbi 20% e votave në Hungari, opozita kryeson me mbi 49%, Orban afro 42%
Rezultatet e para nga zgjedhjet në Hungari tregojnë një epërsi të fortë të opozitës. Me 21.5% të votave të numëruara, partia Tisza ka marrë 49.43% të votave.
Ndërkohë, kryeministri Viktor Orbán dhe partia e tij Fidesz ndodhen shumë prapa, me vetëm 41,99%.
Sondazhet e nxjerrin në avantazh, lideri i opozitës në Hungari u bën thirrje mbështetësve: Mos bini pre e provokimeve
Lideri i opozitës dhe sfiduesi i kryeministrit Viktor Orbán, Péter Magyar, deklaroi se pjesëmarrja në zgjedhje ka qenë shumë e lartë dhe se mbi 6 milionë qytetarë kanë votuar
“Edhe një herë, hungarezët bënë histori”, ishin fjalët e para të Magyar pas votimit. “Mbi 6 milionë kanë votuar. Jemi optimistë për rezultatin”.
Ai u bëri thirrje mbështetësve të tij të ruajnë qetësinë dhe të shmangin çdo provokim: “Të qëndrojmë paqësorë, të mos i nënshtrohemi asnjë provokimi”.
Ndërkohë, në Budapest, në sheshin Batthyány, ka nisur pritja e rezultateve në qendrën e Tisza-s. Sipas Magyar, të gjithë janë të mirëpritur: “I bëj thirrje të gjithëve të qëndrojnë të qetë dhe të mos bien pre e asnjë provokimi nga partia në pushtet apo propaganda. Zoti e bekoftë Hungarinë!”, shkroi ai në rrjetin X.
Ai pritet që së shpejti të marrë pjesë në tubimin e mbështetësve të tij në brigjet e Danubit, në kryeqytet.
Lideri i opozitës në Hungari: Orët e fundit të regjimit të Orbánit
Pas mbylljes së procesit të votimit në zgjedhjet parlamentare, ku pjesëmarrja arriti shifrën rekord 77.8%, lideri i opozitës hungareze, Péter Magyar, shprehet hapur: «Regjimi po jeton orët e tij të fundit, jemi në prag të një ndryshimi sistemi. Le ta kalojmë së bashku! Të qëndrojmë të gjithë të qetë dhe me humor të mirë: koha është në anën tonë! Zoti e bekoftë Hungarinë!»
Përfundojnë votimet parlamentare në Hungari, sondazhi parazgjedhor: Opozita 55%, partia e Orbanit vetëm 38%
Pas mbylljes së qendrave të votimit janë publikuar sondazhet e kryera para zgjedhjeve. Sipas tyre, opozita e udhëhequr nga Tisza parashikohet të marrë 55% të votave, ndërsa Fidesz, partia e Orbánit, rreth 38%.
Sondazhi është realizuar nga 212 Research Centre. Sipas këtij instituti, Tisza mund të fitojë deri në 132 vende nga gjithsej 199 në Parlament.
