Kastriot Qendro ose sikurse i thërrasin në fshatin e tij Boçja, është një nga të paktët që i dha fund emigrimit në Greqi për të vazhduar jetën në vendlindje. I nxitur nga lehtësirat që Qeveria ofron për emigrantët, ai vendosi të rikthehej pas tri dekadave emigrim. Kursimet vendosi t’i investojë në agroturizëm, në fshatin Dragot të Tepelenës.
“U largova nga Greqia pasi dëgjova Kryeministrin që çdo njeri mund të investojë në vendin e tij sepse do ketë mbështetje. Kjo është e para. E dyta është nostalgjia. Unë këtu jam rritur afër Vjosës, afër gjelbërimit. Nuk ka gjë më të bukur se sa të jesh në vendin tënd, se në vend të huaj askush nuk të njeh”, tha Kastriot Qendro, pronar bujtine.
Një ndërtesë tërësisht me profile druri dhe me një hapësirë të bollshme ku lulëzojnë të mbjellat stinore. Kushdo ketu mund të shijojë natyrën e qetë buzë Vjosës, malet perreth Golikun dhe Trebeshinën.
“Për momentin puna nuk është shumë lart por unë do bëj durim sepse sapo jam kthyer. Këtu është natyra e mrekullueshme dhe kam besim se do më ecë puna. Po realizoj ëndrrën time dhe bashkë me familjen jemi të lumtur qe jemi kthyer”, tha ai.
Kastrioti vendosi të kthehej nga emigracioni së bashku me familjen duke iu futur aventurës më të re të agroturizmit. Ka vetëm tre ditë që ka çelur bujtinen dhe frytet e punës janë të mbara. Ka arritur te kombinoje kulinarine greke me ate shqiptare.
“Djathin, mishin, fruta-perimet janë të gjitha të zonës. Im shoqe është në kuzhinë dhe unë në shërbim. E kemi me pasion të madh këtë punë. Do bëj dhe ndërtime të tjera por pres lejen për punimet, u shpreh Kastriot Qendro.
Kastrioti guxon t’u bëjë thirrje emigrantëve të rikthehen në Shqipëri dhe të investojnë në vendlindje pasi ky është dhe epilogu i një historie që nisi për ta në vitet ’90 atëherë kur ishin ne izolim e varfëri./Shqiptarja.com/
