Pas debatit në distancë për shqiptarët që ndodhen në burg në Britani, Farage ka pranuar ftesën e kryeministrit për të vizituar Shqipërinë. Në një tjetër reagim në rrjete sociale, deputeti britanik thotë se do të diskutojnë për këtë çështje që shkaktoi diskutime mes tyre. I përgjigjet Rama.
Nigel Farage vijon replikat me Ramën: Ai nuk ka turp dhe është argëtues, por duhet t’i marrë në Shqipëri kriminelët! Jam gati të vij në Tiranë
Pasi Nigel Farage pranoi ftesën për të vizituar Shqipërinë, ka reaguar edhe kryeministri Edi Rama duke thënë se pretendimi i tij tashmë është shndërruar nga “1 në 50 shqiptarë në burg” në “1 në 3”. Rama thotë se vizita e tij në Shqipëri do ta frymëzojë me ide në vend që të luftojë kundër njerëzve.
“Nigel, Nigel, Nigel… Nga “një kriminel në pesëdhjetë shqiptarë”, pretendimi juaj tani është shndërruar në: “Ndoshta është një në tre, ndoshta një në katër, nuk e di…” Vërtet?! Nuk e dini? Dhe kjo vjen pasi thoni se i keni kontrolluar dy herë shifrat? Unë tashmë ju drejtova te të dhënat e vetë The Telegraph (me bujari, mund të shtoj) duke zgjedhur referencën tuaj, megjithëse një referencë vetëkontradiktore. Por dukeni të vendosur të vazhdoni në gabim. Pra, më lejoni t’ju ndihmoj me sqarime të mëtejshme. Sipas të dhënave nga Ambasada e Shqipërisë në Mbretërinë e Bashkuar, një institucion që merret me njerëz të vërtetë, jo me fraza të Brexit, numri i shqiptarëve në vendin tuaj nuk është 53,000, siç sugjeron fillimisht The Telegraph. Në fakt, në të njëjtin artikull, ajo pranon, dhe citoj, “analiza ka të ngjarë ta ketë nënvlerësuar madhësinë e popullsisë shqiptare”. Pastaj spekulon se shifra mund të jetë deri në 140,000. Në realitet, z.@Nigel_Farage E di çfarë? Shifra është mbi 300,000, vëlla! Këta janë njerëz që mësojnë fëmijët tuaj, që ndërtojnë shtëpitë tuaja, që kujdesen për të moshuarit dhe të sëmurët tuaj. Ata nuk janë mish për dhëmbët e propagandës së shpëlarjes së trurit pas Brexit-it. Ata janë pjesë e strukturës së gjallë dhe që merr frymë e shoqërisë suaj. Edhe pa kontrolluar moshën, gjininë apo statusin socioekonomik, raportet tuaja bien. As një në pesëdhjetë. Dhe sigurisht jo një në tre ose katër. Këto nuk janë statistika, janë taktika frikësimi të maskuara si të dhëna. Pra, më lejoni t’ju pyes qartë: pse është kaq e vështirë të pranosh se ke gabuar, pa zvarritur në baltë një komunitet të tërë njerëzish të shkëlqyer dhe punëtorë që i shërbejnë atdheut tënd me dinjitet sikur të ishte i tyri? Britania është tashmë e madhe dhe jo më pak për shkak të diversitetit, qëndrueshmërisë dhe forcës së saj shumëkulturore. Një komb në stres politik post-traumatik nuk ka nevojë për kurbane. Nuk ka nevojë për goditje të kota. Dhe sigurisht nuk ka nevojë për mite në vend të fakteve. Shpresoj sinqerisht që vizita juaj e ardhshme në Shqipëri t’ju frymëzojë të luftoni për ide, në vend që të luftoni kundër njerëzve – në frymën e traditës së madhe liberale për të cilën vendi juaj ka qëndruar prej kohësh. Pres me padurim t’ju mirëpres në vendin tonë të bukur si mysafir nderi. Por, përpara se të arrini për të shijuar diellin e vërtetë dhe mikpritjen e sinqertë, a mund të biem dakord të diskutojmë faktet, jo fantazitë tuaja pas së vërtetës? Le të caktojmë datën”, reagoi Rama.
Më heret deputeti britanik Nigel Farage njoftoi se kishte pranuar ftesën e kryeministrit Edi Rama për të vizituar Shqipërinë. Krahas një videoje që ka ndarë në rrjete sociale, teksa i qëndron me ‘kokëfortësi’ akuzave të tij, Farage bën me dije se do të diskutojnë kthimin e të burgosurve, duke “këmbëngulur” se ka fituar “bastin” dhe se Rama do të duhet që të marrë mbrapsht të gjithë të burgosurit, ashtu sikurse edhe deklaroi disa ditë më parë.
“E pranoj ftesën e kryeministrit Edi Rama për të vizituar Shqipërinë si i ftuar nderi. Do të diskutojmë kthimin e të burgosurve shqiptarë.”, ka shkruar Farage krahas videos, në të cilën rithekson komentet e tij të ditëve të fundit.
“Një në 50 shqiptarë në Britani është në burg. Dhe unë fola për këtë para pak ditësh në GB News. Edi Rama, ky gjigand njeri që është Kryeministër i Shqipërisë, ka reaguar dhe ka thënë se “po flas broçkulla”, se shifrat e mia janë të gjitha të gabuara. Ai gjithashtu tha: “Si guxon Britania të mendojë për të dërguar njerëz jashtë vendit që u është refuzuar kërkesa për azil”.
Po vetë ai është duke bërë një marrëveshje me Italinë për të marrë disa nga azilkërkuesit e tyre të dështuar. Çfarë hipokrizie nga ky Kryeministër pro-Bashkimit Europian dhe anti-Brexit. Epo, po të them një gjë, Edi: nëse je burrë i mirë, pse nuk i merr të gjithë të burgosurit tanë shqiptarë?
Ai tha që nëse shifrat e mia janë të sakta, do të marrë çdo shqiptar në burg dhe do ta kthejë në Shqipëri. Ne i kemi kontrolluar dhe ri-kontrolluar shifrat tona. Jemi në rregull. Por Edi thotë, jo, keni gabim, sepse ka mijëra emigrantë të paligjshëm nga Shqipëria në Britani. Epo, kjo do të thotë që numri i kriminelëve nuk është një në 50. Ndoshta është një në tre. Ndoshta një në katër. Nuk e di. Gjithsesi, debati vazhdon me Kryeministrin shqiptar.”, thotë Farage, teksa shton se ka pranuar ftesën.
Përplasja në distancë nisi pas reagimit të ashpër të Farage lidhur me një deklaratë të kryeministrit Edi Rama për The Guardian se plani i Keir Starmer për të dërguar azilkërkuesit jashtë vendit tregon se Britania post-Brexit ndodhet në “një vend shumë të errët”.
Farage u kundërpërgjigj përmes një interviste në GB News, ku tha se në Britaninë e Madhe shqiptarët janë aktorë kryesorë në kriminalitet, duke pretenduar se 1 në 50 shqiptarë janë në burg. Kreu i qeverisë shqiptare e sfidoi për një përballje shifrash reale, ndërsa u zotua se nëse pretendimi i tij rezulton i vërtetë, atëherë ai do t’i marrë të gjithë në Shqipëri. I bindur se shifra e Farage nuk qëndron, Rama tha se nuk pret të marrë nga ai ndjesë, por e ftoi që të vinte në Shqipëri të njihte në të vërtetë popullin shqiptar.
Pasi Farage reagoi duke thënë se në fakt ishin në burg një në 48 shqiptarë, Rama e kundërshtoi sërish, duke thënë se një në çdo 100 shqiptarë janë të arrestuar, për shkak se numri i shqiptarëve në Angli është 140 mijë dhe jo 53 mijë, siç pretendoi Farage.
Postimi i Nigel Farage]
