Kryeministri Edi Rama ka publikuar sot, 30 gusht, pamje nga kantieri i ndërtimit të Automotoparkut të Elbasanit, duke e cilësuar projektin si një investim strategjik që do të transformojë shërbimet e automotorizimit, infrastrukturën sportive dhe turistike të Shqipërisë.
Sipas kreut të qeverisë, kompleksi është duke u ngritur sipas standardeve më të larta, duke synuar ta kthejë Shqipërinë në një qendër moderne të sporteve motorike në rajon.
“Po merr formë hap pas hapi Automotoparku në Elbasan, kompleksi sportiv ndërkombëtar, sipas standardeve më të larta të FIA dhe FIM. Ky investim strategjik do të sjellë një transformim të rëndësishëm në shërbimet e automotorizimit dhe në infrastrukturën sportive e turistike të Shqipërisë”, shkruan Rama, duke ndarë edhe një video nga kantieri.
