Qeveria Rama 4 pritet të marrë votëbesimin në Kuvend, në një seancë plenare që siç tradita e do, mund të zgjasë dy ditë, të enjten dhe të premten. Më tej, kabineti i ri, do të duhet të betohet mbi kushtetutë në Presidencë.
Para se të shkojnë në parlament, emrat e ministrave të rinj, pritet të dekretohen nga kreu i shtetit Bajram Begaj.
Ditën e premte, gjatë 1 orë e 20 minutave në presidencë, Edi Rama, jo vetëm mori emërimin e tij si kryeministër dhe të drejtën ligjore për formimin e qeverisë, por dhe i dorëzoi, Kreut të shtetit, aty për aty, edhe 16 emrat e kabinetit të tij në mandatin e katërt. Nga presidenca,
Pikëpyetjet më të mëdha, janë se çdo të bëhet me anëtaren e 17-të të kabinetit, Diellën, të parën ministre virtuale në botë. A do të ketë për të një dekret të posaçëm?
Burimet sqaruan se Diella për momentin është vetëm në nenin 2 të dekretit të parë të Presidentit, ku përveçse emëroi Edi Ramën, kryeministër, specifikoi se ushtron edhe përgjegjësinë “për ngritjen dhe funksionimin e ministrit virtual të Inteligjencës Artificiale “Diella”.
Por kush po e krijon Diellën dhe kur do të jetë ajo funksionale?
Deri më tani nuk ka një përgjigje zyrtare nga Kryeministria, se me çfarë të dhënash po furnizohet Diella për sektorët që do të ketë në kompetencën e saj dhe se kur mund të jetë gati ministrja e parë virtuale.
Në kushtet kur 16 ministrat të premten pas votëbesimit në Kuvend, pritet të bënë dorën mbi kushtetutë e të firmosin betimin në Presidencë, si do të jetë kjo procedurë për Diellën?
A ekziston mundësia që kryeministri të cilit përmes dekretit presidencial iu dha detyra edhe për ngritjen e ministrit virtual, të mund të betohet në vend të Diellës?
Megjithë këto pikëpyetje, ende ka mjegull juridike për bazën kushtetuese në pikën 2 të dekretit të parë të presidentit për ushtrimin e përgjegjësisë nga kryeministri për funksionimin e ministrit virtual, dekret që opozita e ka cilësuar antikushtetues.
