Në Kampionatin Evropian të Mundjes që po zhvillohet në Pallatin e Sportit ‘Feti Borova’ në Tiranë, mundësi që përfaqëson Shqipërinë, Islam Dudaev është kualifikuar për në finalen e peshës deri në 65 kilogramë për disiplinën e stilit të lirë.
Ruso-shqiptari kaloi pa shumë vështirësi turkun Ahmet Duman në fazën kualifikuese, duke e mposhtur 6-1. Në fazën çerekfinale Dudaev u përball kundër gjeorgjianit Nika Zakashvili, duke fituar 3-1 në një përballje që tregoi gjithë cilësitë dhe teknikën e mundësit tonë.
Në fazën gjysmëfinale Dudaev mposhti pastër 4-0 me pikë rusin Islam Guseinov, i cili garon nën ombrellën e Federatës Botërore të Mundjes, për shkak se Rusia nuk është e mirëpritur në këto aktivitete pas sulmit mbi Ukrainë.
Tanimë në finalen e madhe e cila zhvillohet nesër pas orës 18:20, Dudaev do kërkojë medaljen e artë kundër rusit tjetër, Bashir Magomedov. Në këtë turne Islam Dudaev tanimë e ka siguruar medaljen e argjendtë, ndërsa synon të artën.
