Ministri për Evropën dhe Punët e Jashtme, Ferit Hoxha, po merr pjesë në Sofje në aktivitetet përmbyllëse të Presidencës bullgare të Procesit të Bashkëpunimit në Evropën Juglindore (SEECP) për periudhën 2025–2026, ku po zhvillohet takimi i ministrave të jashtëm të vendeve anëtare.
Në kuadër të kësaj vizite, Hoxha zhvilloi një takim dypalësh me ministren e Jashtme të Bullgarisë, Velislava Petrova. Dy zyrtarët vlerësuan marrëdhëniet e mira mes dy vendeve dhe theksuan nevojën për zgjerimin e bashkëpunimit në sektorë strategjikë, përfshirë energjinë, infrastrukturën dhe projektet e ndërlidhjes rajonale.
Në një reagim publik, kreu i diplomacisë shqiptare vuri në dukje rëndësinë e Korridorit VIII, duke e cilësuar atë një projekt kyç që lidh rajonin e Adriatikut me atë të Detit të Zi. Sipas tij, ky korridor mbart potencial të konsiderueshëm për nxitjen e tregtisë, përmirësimin e lëvizshmërisë dhe forcimin e zhvillimit ekonomik të qëndrueshëm në Evropën Juglindore.
Hoxha falënderoi gjithashtu Bullgarinë për mbështetjen e vazhdueshme ndaj rrugëtimit evropian të Shqipërisë, duke vlerësuar rolin e saj në promovimin e politikës së zgjerimit të Bashkimit Evropian.
Gjatë bisedimeve, palët shkëmbyen mendime edhe mbi zhvillimet aktuale në rajon dhe në arenën ndërkombëtare, duke riafirmuar përkushtimin e përbashkët për stabilitetin, sigurinë, marrëdhëniet e fqinjësisë së mirë dhe integrimin evropian të Ballkanit Perëndimor.
Një tjetër temë e diskutuar ishte edhe roli i pakicave kombëtare në të dy vendet, të cilat u konsideruan si faktorë të rëndësishëm për forcimin e miqësisë dhe bashkëpunimit mes Shqipërisë dhe Bullgarisë.
Takimi në Sofje shihet si një hap i mëtejshëm në konsolidimin e marrëdhënieve dypalëshe dhe në avancimin e projekteve rajonale, me Korridorin VIII që mbetet ndër prioritetet kryesore për zhvillimin ekonomik dhe integrimin evropian të rajonit.
