Një adoleshent ka humbur jetën dhe disa të tjerë janë plagosur pas një shpërthimi gjatë një ekskursioni shkollor izraelit pranë kufirit me Libanin, sipas shërbimeve izraelite të emergjencës.
Forcat e Mbrojtjes së Izraelit (IDF) deklaruan se, sipas një vlerësimi fillestar të ushtarëve në vendngjarje, shpërthimi dyshohet se u shkaktua nga një municion i pashpërthyer i Hezbollahut, i cili kishte rënë në atë zonë. Nuk dihet ende se kur ishte lëshuar predha.
Fotot e publikuara nga IDF-ja tregojnë një helikopter ushtarak që po transportonte të plagosurit drejt spitaleve për trajtim mjekësor.
“Dyshimi është se një municion i pashpërthyer i një lloji të caktuar shpërtheu në duart e njërit prej nxënësve”, deklaroi zëvendëskomisioneri i policisë, Meir Eliyahu, komandant në distriktin verior të Izraelit, sipas agjencisë së lajmeve Reuters.
Fotografi e publikuar nga Forcat e Mbrojtjes së Izraelit, ku shihen ushtarë duke vepruar në vendngjarje.
Sipas United Hatzalah, një shërbim izraelit i reagimit ndaj emergjencave, tre persona pësuan lëndime të rënda, ndërsa të paktën 10 të tjerë pësuan lëndime nga të lehta deri në mesatare.
Të plagosurit u transportuan në tri spitale të zonës, bëri të ditur policia.
Në një deklaratë, bashkia e Ma’alot-Tarshiha, në Izraelin verior, tha se nxënësit dhe personeli i shkollës po merrnin pjesë në ekskursionin e përvitshëm të institucionit kur ndodhi shpërthimi.
Ministria e Arsimit e vendit e cilësoi ngjarjen si një “incident jashtëzakonisht të vështirë”, duke shtuar se mendimet e saj janë me viktimat dhe familjet e tyre.
Komisioneri i policisë, Daniel Levy, i tha Reuters se bëhej fjalë për një “incident shumë të rëndë, në të cilin u lënduan fëmijë që kishin dalë në një ekskursion shkollor, për fatin tonë të keq”.
Të hënën në mbrëmje, kryeministri Benjamin Netanyahu, së bashku me ministrin e Arsimit të Izraelit, vizitoi të plagosurit dhe familjet e tyre në spitalin Rambam në Haifa.
Netanyahu udhëzoi IDF-në të forcojë masat dhe ndalimet që lidhen me prekjen e municioneve të pashpërthyera.
Fotografi e publikuar nga Forcat e Mbrojtjes së Izraelit, ku shihen ushtarë duke vepruar në vendngjarje. Një pjesë e fotografisë është turbulluar nga burimi.
Menjëherë pas shpërthimit, i cili ndodhi të hënën pasdite, policia izraelite deklaroi se dyshimi fillestar ishte se shpërthimi ishte shkaktuar nga një municion i pashpërthyer pranë kufirit, në zonën e fshatrave Yiftah dhe Manara.
Ekspertët e çaktivizimit të bombave u dërguan në vendngjarje për të hetuar shkakun e shpërthimit, bëri të ditur policia.
Shërbimi izraelit i emergjencës MDA e cilësoi ngjarjen si një “incident kompleks”, ndërsa dërgoi ekipe të shumta në zonë.
“Ne dërguam me shpejtësi forca të konsiderueshme në vendngjarje, përfshirë ambulanca, njësi të lëvizshme të kujdesit intensiv dhe një helikopter të MDA-së, i cili gjithashtu u nis drejt vendit të incidentit”, deklaroi drejtori rajonal, Itzik Shushan.
Një armëpushim i ndërmjetësuar nga Shtetet e Bashkuara në fund të qershorit duhej t’i jepte fund muajve të konfliktit në jug të Libanit, duke hapur rrugën për dislokimin e ushtrisë libaneze dhe tërheqjen graduale të IDF-së.
Izraeli u tërhoq nga dy zona të vogla përgjatë të ashtuquajturës vijë e verdhë, e cila shënon kufirin e zonës së pushtuar nga ushtria izraelite. Megjithatë, përparimi i mëtejshëm në zbatimin e marrëveshjes ka ngecur kryesisht.
Izraeli ka rrafshuar fshatra të tëra në jug të Libanit dhe ka vazhduar të kryejë sulme të rregullta në atë zonë, në përpjekje për ta larguar Hezbollahun nga territori.
