Pas helmimit masiv të nxënësve dje në shkollën fillore “Dimo Haxhi Dimov”, për të cilin shkaktarët ende po verifikohen, ekipe inspektimi nga Agjencia për Ushqim dhe Veterinari (AUV) po zhvillojnë sot kontrolle të jashtëzakonshme në kuzhinat e 9 shkollave fillore në Komunën e Karposhit, të cilat operohen nga i njëjti operator ushqimor, për të cilin drejtoresha e shkollës, Lela Nikolloska, konfirmoi për Meta.mk se është kompania “Vanila Food”. Në pronësi të këtij operatori ushqimor është edhe magazina qendrore që ndodhet në shkollën fillore “Dimo Haxhi Dimov” në Shkup, nga ku merren materialet për përgatitjen e ushqimit, transmeton Portalb.mk.
“Si pjesë e kontrolleve të jashtëzakonshme në këto shkolla, ku nuk ka nxënës që kanë shfaqur simptoma helmimi nga ushqimi, po merren mostra nga ushqimi dhe sipërfaqet e punës për testime laboratorike. AUV po pret rezultatet e analizave të mostrave të ushqimit dhe sipërfaqeve të punës nga kontrolli i jashtëzakonshëm i djeshëm, i cili u krye bashkërisht nga inspektorët e ushqimit të AUV-së, Inspektorati Shtetëror Shëndetësor dhe Sanitar, Qendra për Shëndet Publik dhe Instituti i Shëndetit Publik”, thuhet në komunikatën e AUV-së.
Të paktën dyzet fëmijë në shkollën “Dimo Haxhi Dimov” në Komunën Karposh janë helmuar, më së shumti nga ushqimi që konsumuan gjatë ditës së djeshme në shkollë. Institucionet e lartpërmendura morën dje mostra nga sipërfaqet e punës dhe ushqimi, si dhe tamponë nga duart, hunda dhe fyt te të gjithë punonjësve të kuzhinës.
Sipas drejtoreshës së shkollës, Lejla Nikolloska, bëhet fjalë për 40 fëmijë.
“Dje fëmijët për mëngjes kishin cornflakes me qumësht, ndërsa për drekë hëngrën musaka. Janë fëmijë filloristë që kanë vakt të ngrohtë dhe janë në mësim gjithëditor. Gjatë ditës së djeshme, pasi shkuan në shtëpi, shfaqën dhimbje në stomak. Disa prej tyre, prindërit i dërguan tek mjeku. Nuk mund të them me saktësi sa fëmijë janë, por për momentin janë rreth 40. Numrat më të saktë do t’i kemi pasi të shohim numrin e mungesave sot. Në shkollën tonë ushqimi përgatitet nga “Vanila Food”. Nuk dua të paragjykoj nëse shkaktari i helmimit është ushqimi apo ndonjë baktere nga sipërfaqet e punës, do të shohim çfarë tregojnë analizat”, tha Nikolloska për Meta.mk.
Drejtoresha e Institutit të Shëndetit Publik, Marija Andonovska, tha dje se të gjitha protokollet janë ndjekur menjëherë dhe se janë marrë edhe mostra nga uji që pinë fëmijët në objektin shkollor.
“U morën mostra nga çdo gjë që na intereson, si tamponë nga personeli që punon në kuzhinë, nga duart, fytit dhe hunda. U morën tamponë edhe nga sipërfaqet e punës dhe mostra nga ushqimi që konsumuan fëmijët. U morën edhe mostra nga uji”, tha Andonovska.
Ajo sqaroi se analizat do të zgjasin dhe nuk mund të jepet përgjigje e shpejtë se për çfarë bëhet fjalë. Andonovska tha se kanë marrë 9 raporte për shqetësime stomaku te fëmijët, ndërsa deri tani nuk janë raportuar simptoma te punonjësit e shkollës.
