Kristjan Asllani është shumë pranë aventurës së re në Serie A. Mesfushori i Kombëtares ka dhënë miratimin e tij për t’u bashkuar me Bolognan, skuadrën që e sheh si përforcim të rëndësishëm për sezonin e ardhshëm. Nga ana tjetër Interi ka dhënë miratimin për largimin e tij dhe Bologna është në negociata me lojtarin.
Marrëveshja duket se është gjetur për 13 milionë euro dhe zikaltërit do lironin një vend në mesin e fushës. Megjithëse klubi nga Milano kërkonte 16 milionë euro, ata janë ulur në kërkesë edhe sepse kanë shtuar një pikë në kontratë, që sipas medieve në Itali ka të bëjë për përqindjen në rast të rishitjes nga Bologna.
Paga e Asllanit te Interi ka qenë 2 milionë euro në sezon, por 23-vjeçari mund të pajtohet të ulë pretendimet në 1.5 milionë euro, duke pasur një kontratë që i intereson në aspektin e viteve dhe një fanelle titullare. Katër vite kontratë për Asllanin, me mundësi rinovimi edhe për një tjetër.
Një faktor kyç që Asllani zgjodhi Bolognan dhe jo Torinon, apo Celta Vigon, është edhe fakti se do jetë pjesë e Europa League në sezonin e ri.
